Alekseı Navalnyıdyń anasy shyryldap, vıdeo úndeý joldady

"Men jańa ǵana Salehard qalasyndaǵy tergeý komıteti ǵımaratynan shyqtym. Ol arada tergeýshilermen jáne krımınalıstermen jalǵyz júzdesip, bir táýlikke jýyq ýaqyt boldym. Olar advokatty tek búgin tústen keıin ǵana kirgizdi. Al keshe keshkisin olar meni qupııa túrde múrdehanaǵa aparyp, ulymdy kórsetti. Tergeýshiler medısınalyq jáne zańnamalyq qujattar ázir ekenin, onyń barlyǵy óz qoldarynda ekenin jetkizdi. Men olardy kórdim. Medısınalyq kýálik qaǵazǵa qol da qoıdym. Zań boıynsha olar ulymnyń denesin maǵan birden berýi kerek. Biraq olar ýaqytty áli sozbalap keledi.

Onyń ornyna ózime qoqan-loqy kórsetip, maǵan nesheme túrli talap qoıýda. Atap aıtqanda, Alekseıdi qalaı, qaıda jerleý kerektigi boıynsha. Olardyń bulaı buıyrýǵa maǵan qaqysy joq, bul zańsyzdyq, árıne. Týra meniń kóz aldymda olarǵa buıryq kelip túsip jatty: birese Kremlden, birese ortalyq tergeý komıtetiniń ortalyq apparatynan. Olar jerleý rásimi qupııa ári qoshtasý rásiminsiz ótkenin qalaıdy. Bir sózben aıtqanda, olar meni zırat basyna ertip kelip, "myna arada Sizdiń balańyz jatyr" degisi keledi.

Árıne, men munymen kelispeımin. Men Alekseıdi qadir tutatyn adamdardyń onymen qoshtasýyna múmkindigi bolsa deımin. Bul vıdeo úndeýdi jazýyma meniń tarapyma jasalyp jatqan qoqan-loqynyń kúsheıýi sebep. Olar jerleý rásimin qupııa ótkermeseń, «balańyzdyń denesine birdeńe jasaımyz» degendi de aıtyp jatyr. Men bir keremet talap qoıyp otyrǵanym joq. Tek bári zań júzinde bolsyn deımin. Men balamnyń denesin tez arada berýin talap etemin!", deıdi qaraly ana Lıýdmıla Navalnyı X jelisinde bólisken vıdeoda.

Aıta ketsek,  2024 jyly 16 aqpanda Reseıde 19 jylǵa sottalyp, jazasyn ótep jatqan oppozısııalyq saıasatker Alekseı Navalnyıdyń túrmede kóz jumǵany belgili boldy. Nemsovtan keıin Pýtın rejımimen kúresýshi tulǵa Navalnyıdyń qupııa ólimi qoǵamda úlken narazylyq týǵyzdy.

Mundaı jaǵdaı Qazaqstanda Mustafa О́ztúrikke qatysty bolǵanyn da aıta ketelik. «...Joǵarydaǵylar aıtty, bılet alynyp qoıdy, tańerteń ushaqpen Túrkııaǵa jiberedi» deıdi aǵam. «Qalaı, osynda nege jerlenbeıdi» dedim men, árıne. Anasy solaı depti degen soń sol arada únimiz óshti. Biraq erteńinde bilemiz ǵoı, sóıtse Mustafanyń anasy bala-shaǵasymen Qazaqstanǵa shyǵýǵa ushaqqa bılet alyp qoıypty, alaıda bizdegiler olardyń bıletin ótkizdirtip, deneni ózderi alyp baratynyn aıtqan eken. Bul jerde Mustafany jerleýge qoryqqan, halyq jınalyp ketedi dep qaýiptengen», deıdi taıaýdaǵy suqbatynda alty ret Májilis depýtaty bolǵan Serik Ábdirahmanov. Bul týraly Qamshy.kz saıtyndaǵy "Mustafa О́ztúrik" atty maqaladan tolyǵyraq tanysyp, bile alasyzdar.