15 Qazan, 2024 NEWS
Qazaqstandyq eks-sheneýniktiń otbasy Dýbaıda 30 jyljymaıtyn múlikke ıelik etetini belgili boldy
Memlekettik qorǵanystyq tapsyrys komıtetiniń burynǵy tóraǵasy Maqsat Orysbaevtyń otbasy Dýbaıda 30 jyljymaıtyn múlikke ıelik etken. Bul týraly amerıkalyq C4ADS uıymynyń (halyqaralyq qylmys pen qaqtyǵystardy zertteıtin kommersııalyq emes qurylym, bas keńsesi Vashıngtonda) derekterine silteme jasap Azattyq habarlady.
Kórneki sýret
Maqsat Orysbaev memlekettik qorǵanystyq tapsyrys komıtetin 7 jyl basqarǵan, oǵan deıin keden komıtetinde jumys istegen.
Orysbaevtyń atyna THE SUMMIT ǵımaratynyń 20 jáne 23 qabattaryndaǵy toǵyz páter tirkelgen. Orysbaev ınvestısııa salǵan Dubai Marina aımaǵyndaǵy THE SUMMIT kesheni áli salynyp bitken joq. Qurylys aıaqtalǵannan keıin ǵımarat sándi 38 qabatty bıznes ortalyǵy men turǵyn úı keshenine aınalýy kerek. Biraq joba sozylyp ketti. Dýbaıdaǵy jyljymaıtyn múlik naryǵy týraly Propsearh.ae saıty ǵımarattyń ataýy men ázirleýshisi ózgergenin jazdy.
C4ADS qujattaryna saı, Orysbaevtyń uly Ilııas Dýbaıda 17 jyljymaıtyn múlikke ıelik etedi. Onyń Palm Jumeirah aralyndaǵy vıllasynyń aýdany 600 sharshy metrden asady. Sondaı-aq páterleri jasandy araldaǵy MARINA RESIDENCE kesheninde jáne Dýbaı Marınadaǵy GRANDEUR RESIDENCES pen RIMAL-da ornalasqan. Sonymen qatar onyń ARMADA ǵımaratynda da birneshe keńsesi bar. Ilııas – Qazaqstanda tirkelgen úsh kompanııanyń quryltaıshysy.
Jyljymaıtyn múlik tizilimine sáıkes, Dýbaıdaǵy eki páter Maqsat Orysbaevtyń qyzy Aınel Oryspaevaǵa tıesili. Eki páter de GRANDEUR RESIDENCES turǵyn úı kesheninde ornalasqan. C4ADS tizilimine saı, Dýbaıdaǵy Orysbaevtardyń atyna tirkelgen úılerdiń jalpy quny – salynyp jatqan ǵımarattaǵy páterlerdi qospaǵanda 5 jáne 9,5 mıllıard teńge aralyǵynda.
Maqsat Orysbaev qymbat úılerdi satyp alýǵa qarajatty qaıdan aldy? Buny Azattyq jýrnalısteri onyń ózinen suraýǵa tyrysty. Biraq Orysbaev Dýbaıdaǵy jyljymaıtyn múlik týraly suraqty estigen boıda telefondy óshirip tastady.
Vlast.kz-tiń dereginshe, Maqsat Orysbaev 2023 jyly Qorǵanys mınıstrligi mekemelerine 700 mıllıon teńgeden astam somaǵa memlekettik satyp alýlar boıynsha alaıaqtyq jasaǵany týraly qylmystyq iste atalǵan. Biraq oǵan sybaılas jemqorlyqqa qatysty aıyp taǵylmaǵan.
Jýrnalıster alǵan Dýbaıdaǵy jyljymaıtyn múlik tizilimi 2020-2022 jyldar aralyǵyn qamtıdy. Tizilimge saı, 1550 Qazaqstan azamaty Dýbaıda jalpy quny mıllıard dollardan asatyn 2700 jyljymaıtyn múlikke ıelik etedi.
Qate tapsańyz, qajetti bólikti tańdap ctrl+enter basyńyz.
Usynylǵandar
Pikir qaldyrý
pikir