Yessenov University qyzmetkerleri AES qurylysyn talqylady

Aqtaýda AES qurylysyn qoldaý jónindegi shtab músheleri Yessenov University qyzmetkerlerimen kezdesip, referendým, atom elektr stansııasynyń bolashaǵy, ǵylym men bilim jaıly pikir almasty.

Qazirgi tańda elde óndiriletin barlyq elektr energııasynyń shamamen 70%-y kómir elektr stansııalaryna táýeldi. Alaıda, jumys istep turǵan stansııalar jyl ótken saıyn tozyp, isten shyǵýda. Bul óz kezeginde elektr energııasynyń tapshylyǵyna ákep soǵýy múmkin. Sonymen qatar eldiń ekonomıkasy men ekologııasy úshin de asa qaýipti.

Shtab músheleriniń aıtýynsha, eldiń energetıkalyq turaqtylyǵyn saqtap, túrli salada top bastaýymyz úshin AES boı kóterýi kerek. Al AES qyzmeti men salynýyna, el azamattaryn turaqty jumyspen qamtýǵa memleket qaýqarly ekenin alǵa tartty.

- Halyq AES-nyń bolashaǵyna, onda jumys isteıtin jastardyń bilim, biliktiligine, qurylys jumystaryna alańdaýly. Senimsizdikti seıiltý úshin aıta keteıik, qazir elde eki iri ǵylymı-zertteý uıymy bar. Onyń biri Kýrchatov qalasyndaǵy Ulttyq ıadrolyq ortalyǵy jáne Almatydaǵy Iаdrolyq fızıka ınstıtýty. Olar atom elektr stansııalaryn qurý prosesin ǵylymı-tehnıkalyq qamtamasyz etý qyzmetin atqarady. Osy eki uıymnyń bazasynda IGR, IVG.1M jáne VVR-K ǵylymı-zertteý ıadrolyq reaktorlarynyń iske qosylýy arqyly Qazaqstanǵa ǵylymı tájirıbeler júrgizýge, sondaı-aq ıadrolyq fızıka ádisterin ekonomıkanyń ártúrli salalaryna engizýge múmkindikter ashyldy. Qazirgi ýaqytta Ulttyq ıadrolyq ortalyq atom salasyna kadrlar daıarlaý máselesine kóńil bólinip jatyr. Elimizdegi irgeli JOO-da kadrlar daıarlaý baǵytynda yntymaqtastyq júrgizilýde. Sonymen qatar Iаdrolyq fızıka ınstıtýtynda radıasııalyq qaýipsizdik, baqylaýdyń buzbaıtyn ádisi jáne ıadrolyq qaýipsizdik baǵyttary boıynsha oqý ortalyqtary jumys istep tur, - dedi shtab múshesi Berik Ahmetov.

Eger halyq AES salýdy qoldasa, onda qurylys halyqaralyq MAGATE standartymen jáne sarapshylarynyń baqylaýymen salynatynyn túsindirdi.

Shara sońynda ýnıversıtet ujymy AES-nyń ekologııaǵa, naqtylasaq Balqash kóline áseri, ekonomıkalyq tıimdiligi boıynsha suraqtaryn qoıyp, tolyqqandy jaýap aldy.