"Shyǵyn 650 mıllıon teńge": Ishki ister mınıstrligi izdeýde júrgen alaıaqtardy ustady

Derekterge sensek, jábirlenýshilerge keltirilgen shyǵyn 650 mıllıon teńgeden asady.

"Qaraǵandy qalasynda 45 jastaǵy er adam quryqtaldy. Ol 2018 jyldyń shildesinde ózi Aqtóbede bola otyryp, elordada jyljymaıtyn múlik satyp alyp berý syltaýymen 100 mıllıon teńgeni ıemdengen. Almatyda 44 jastaǵy áıel ustaldy. Ol kókónister men jemisterdi jetkizý syltaýymen azamattardy 516 mıllıon teńgeden astam somaǵa aldaǵan", – delingen mınıstrlik habarlamasynda. 

Astanada 60 jastaǵy jergilikti turǵyn ustaldy. Ol ótken jyldyń qyrkúıek aıynda jeńildetilgen nesıe arqyly turǵyn úı satyp alý syltaýymen 30 mıllıon teńge jymqyrǵan. 

"Sonymen qatar Reseı Federasııasynyń Máskeý qalasynda 30 jastaǵy qazaqstandyq azamat qolǵa tústi. Ol da alaıaqtyq jolmen ondaǵan mıllıon teńgeni qaltaǵa basqan", – dedi mınıstrliktiń resmı ókili Shyńǵys Alekeshev. 

Jalpy qabyldanǵan sharalardyń arqasynda jyl basynan beri polısııa 1 360 qylmyskerdi ustap, myńnan astam joǵalǵan adamnyń ornalasqan jerin anyqtady.

Eske salaıyq, buǵan deıin 27 mıllıon teńge jymqyrǵan qazaqstandyq áıel Túrkııadan ekstradısııalanǵanyn jazdyq. Kúdikti 2022-2023 jyldar aralyǵynda Almatydaǵy kommersııalyq uıymnyń býhgalteri bola otyryp, tólem tapsyrmalaryna jalǵan málimetter engizý arqyly ózine senip tapsyrylǵan qarajatty zańsyz ıemdengen. Qylmys jasaǵannan keıin kúdikti jasyrynǵan. Osyǵan baılanysty ol halyqaralyq izdeýge jarııalandy.