Almaty TV logotıpin ózgertip, jańa jobalar usyndy

Almaty TV kúzgi telemaýsym qarsańynda kórermenderge jańa baǵdarlamalar, teleshoýlar men telehıkaıalar ázirleýmen qatar, dızaıny jeńil ári kóńilge qonymdy – Almaty qalasynyń sımvoly sanalatyn alma túrindegi «A» árpi men «TV» degen qysqarǵan sózi bar japyraq beınelengen jańa logotıpin tanystyrdy.

Jańa logo – telearnada 2022 jyly bastalǵan ózgeristiń jalǵasy. Ol kezde birtutas ımıdjdik baǵyt-baǵdar aıasynda restaılıng júrgizilip, Almaty TV damýynyń jańa satysyn: dástúrli efır men ınternet-orta úılesimin, sondaı-aq shyǵarylatyn baǵdarlamalardyń ekologııalyq tazalyǵyn beıneleıtin arna aıdentıkasy qanyq jasyl túske aýystyrylǵan edi.

Zamanǵa saı tásil telearnanyń basty «ónimi» – burynǵydan da shıraq ári aqparattyq sıpaty basym bola túsken jańalyqtar óndirisinde de qoldanylady. Jańalyqtar men saraptamalyq baǵdarlamalardyń berilý formaty tolyǵymen ózgerdi, ol úshin halyqaralyq tájirıbe negizinde ozyq televızııalyq qurylǵylar qoldanylyp, jańa kórsetý erejeleri ázirlendi.  

Jalpy, Almaty TV 25 jyldyǵynda kórermenderine 25 telejoba, onyń ishinde óz óndirisinen shyqqan 8 jańa telehıkaıa usyndy.

Budan ózge, telearna komandasy Almaty qalasy men turǵyndary týraly baǵdarlamalar toptamasyn:  bıznes damýy týraly «Made in Almaty», qalanyń ótkeni men bolashaǵy jaıly «Almaty kósheleri» baǵdarlamalaryn, sondaı-aq qala belsendilerimen birge jasalatyn «Keri baılanys» jobasyn shyǵarýdy josparlap otyr. Prezıdent Jumysshy mamandyqtary dep jarııalaǵan jyl qarsańynda Almaty TV arnasynda ómirin qolónerge arnaǵan almatylyqtar týraly «Izgi qala turǵyndary» jobasy jaryqqa shyǵady. Telearna efıri sondaı-aq ár jastaǵy, ártúrli ult ókilderi men kásip ıeleriniń kóńildi sátterimen bezendiriledi.  

Osydan biraz ýaqyt buryn Almaty TV respýblıkalyq mártebe alyp, rebrendıng jasap, basty stýdııalyq pavılonyn jańartyp, kórsetilim tujyrymdamasyn túbegeıli ózgertken bolatyn.

Sonyń nátıjesinde 2 jylda teleaýdıtorııa 70% ósip, saıt qaralymy 5 esege – jylyna 9-dan 45 mln qoldanýshyǵa deıin kóbeıdi. Kommersııalyq  kiris 2 esege ósti. Memlekettik tildegi ózindik óndiris úlesi 88%-ǵa jetti.

Derekkóz: almaty.tv saıty