15 Qarasha, 2024 NEWS
Toqaev deklarasııa tapsyrýǵa qatysty málimdeme jasady
Búgin Qasym-Jomart Toqaev Aýyl sharýashylyǵy eńbekkerleriniń birinshi forýmynda sóz sóılep, birqatar mańyzdy máseleni kóterdi. Solardyń biri – deklarasııa
Kórneki sýret
- Biz Ádiletti Qazaqstandy qurý jolynda naqty qadamdar jasap jatyrmyz. Barlyq saladaǵy jumystyń ashyq bolýyna kóńil bólip otyrmyz. Osy oraıda, azamattarymyzdyń tabysyn jappaı deklarasııalaýdyń mán-mańyzy zor. Bul talap 2021 jyldan beri birtindep engizilip jatyr. Alǵashqy úsh kezeńde 4 mıllıonnan astam adam deklarasııa tapsyrdy. Olardyń qatarynda memlekettik qyzmetshiler, kvazımemlekettik sektordaǵy basshylar, kásipkerler men osy sanatqa kiretin azamattardyń jubaılary bar, – dedi Memleket basshysy.
Toqaevtyń aıtýynsha, kelesi jyly taǵy 8 mıllıonǵa jýyq adam deklarasııa tapsyrady dep josparlanyp otyr. Alaıda, bir máseleni eskerý kerek.
«Jappaı deklarasııa tapsyrý tujyrymdamasy osydan 14 jyl buryn qabyldanǵan. Sodan beri elimizde sıfrlandyrý isi jáne fınteh salasy qarqyndy damyp kele jatyr. Túrli memlekettik mekemege ortaq málimetter bazasy paıda boldy. Qarjy ári salyq baqylaýy kúsheıdi. Demek, osyndaı aýqymdy ózgeristerden keıin tórtinshi, ıaǵnı, sońǵy kezeńde azamattardy deklarasııa tapsyrýǵa mindetteý qanshalyqty oryndy degen suraq týady. Úkimet bul máseleni jan-jaqty pysyqtaýy qajet», – dep túıindedi ol.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir