12 Qazan, 2020 Ádebıet

Zeınolla Sánik atyndaǵy kabınet ashyldy

Foto: Aqberen Elgezektiń facebook paraqshasynan

Shyǵys Qazaqstan oblysy Úrjar aýdany Jarbulaq aýylyndaǵy orta mektepte belgili etnograf, jazýshy Zeınolla Sánik atyndaǵy ádebı kabınet ashyldy. Bul týraly aqyn Aqberen Elgezek habarlady.

Zeınolla Sánik atyndaǵy kabınettiń ashylýy

"Zeınolla Sánik atyndaǵy mádenıet qorynyń” uıymdastyrýymen Úrjar aýdanyna saparlap qaıttyq. Jarbulaq aýylyndaǵy orta mektepte jazýshy, etnograf, tarıhshy Zeınolla Sánik atyndaǵy synyptyń ashylýyna qatystyq. 3,5 mln. teńgege jasaqtalǵan ádebıet kabıneti zaman talaptaryna saı jasaqtalǵan eken. Sol synypta bilim alyp, armandaryn ushtaıtyn jasóspirimder úshin qýandyq. Sondaı múmkindikter jasaǵan Qanat Sánik aǵamyzǵa, Qanekeńniń qasynda osyndaı úlken sharýalardy tyńǵylyqty uıymdastyryp júrgen aqyn Serik Qalıev pen Jarqyn Sálenuly myrzalarǵa dán rıza boldyq" dedi aqyn facebook-te ıgi iske bastamashyl bolǵandarǵa alǵysyn jaýdyryp.

Zeınolla Sánik atyndaǵy kabınettiń ashylýy

Zeınolla Múbárakuly Sánik 1935 jyly Qytaıdyń Tarbaǵataı aımaǵynda dúnıege kelgen. Beıjiń qalasyndaǵy ortalyq jastar ınstıtýtyn bitirip, eńbek jolyn baspagerlikten bastaǵan. Úrimjidegi jastar baspasynda jaýapty redaktor bolyp qyryq jyldaı qyzmet atqarǵan. 1955 jyldan bastap ádebı zertteý jumystaryn jaza bastaǵan. Sol ýaqytta Qytaıda júrgizilgen "mádenı tóńkeristiń" aýyr soqqysyna ushyrap, "halyq jaýy" bolyp, aýyr kúnderdi de ótkergen.

Soǵan qaramastan, qalamgerdiń ǵylymı eńbekterinen, roman, povesterinen quralǵan jıyrmadan astam kitaby jaryq kórgen. Qazaqstanda "Qarakereı Qabanbaı", "Has batyr Qabanbaı", "Tuǵyryl han", "Demejan batyr", "Halyq kúıshisi Qaıraqbaı", "Baspaı" atty kitaptary men eńbekteri jarııalanǵan.

Qalamger 2013 jyldyń 26 qyrkúıeginde ómirden ozǵan.

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir