Qazgıdromet jaýyn-shashyn mólsheriniń Altaı Aınabekke esh qatysy joq ekenin málimdedi

"Qazgıdromet" ózin "Jańbyr adam" dep ataıtyn kásipker Altaı Aınabek aıtyp júrgendeı Aral teńizin jaýyn sýymen toltyrý múmkin emes ekenin habarlady.

Memlekettik kásipornyn málimetinshe, Aral mańy Qazaqstan boıynsha kontınentaldy klımatpen sıpattalatyn, qurǵaq ári ylǵal tapshy aımaq. Atalǵan aımaqta jyldyq jaýyn-shashyn mólsheri 100-130 mm shamasynda bolsa, jyldyq býlanýshylyq mólsheri odan ondaǵan ese joǵary, ıaǵnı 1250-1450 mm quraıdy. Bul óz kezeginde jaýyn-shashyn esebinen úlken aýmaqty sý resýrstarymen qamtamasyz etý múmkindikterin shekteıdi.

Sondaı-aq sınoptıkter mamyr-shilde aılarynda Aral mańynda jaýyn-shashynnyń túsýi boljanǵan jaǵdaı ekenin atap ótti.

"Mamyr aıynda (04-08, 13-14, 16-22, 24-25 mamyr) Ońtústik Kaspıı jáne Ońtústik sıklondardyń Qyzylorda oblysynyń aýmaǵynan jıi ótýi nátıjesinde 0,1-den 12 mm-ge deıin jaýyn-shashyn baıqaldy, al 5 mamyrda túnde oblystyń ortalyǵynda 19-27 mm shamasynda qarqyndy jaýyn-shashyn tirkeldi. Maýsym aıynda Ońtústik jáne Atlantıkalyq sıklondardyń yqpalyna baılanysty 06-09 jáne 22-30 maýsymda 0,1-den 4 mm-ge deıin jaýyn-shashyn tústi. Shilde aıynda (01-22 shilde) oblys aýmaǵy baıaý qozǵalatyn Ońtústik sıklonnyń yqpalynda boldy, sonymen 06, 08 jáne 10-20 shilde kúnderi 0,1-den 13 mm-ge deıin jaýyn-shashyn tústi. Joǵaryda aıtylǵandardy eskere otyryp, Qyzylorda oblysy men Qyzylorda qalasynda túsken jaýyn-shashyn tabıǵı sınoptıkalyq jaǵdaılarmen baılanysty bolǵanyn jáne 10 kúnge deıingi dáldikpen aldyn ala boljanǵanyn atap ótken jón. Maýsym-shilde aılarynda túsken jaýyn-shashyn mólsheri ortasha kópjyldyq norma shamasynda nemese odan tómen boldy" deıdi Qazgıdromettegiler.

Qazgıdromet mamandary sondaı-aq bulttyrdy jasandy jolmen belgili bir aımaqqa tasymaldaý múmkin emes ekenin málimdedi.

"Dúnıejúzilik meteorologııalyq uıymnyń arnaıy málimdemesine sáıkes, tabıǵı meteorologııalyq júıelerdiń energııalyq qory sonshalyqty úlken bolǵandyqtan, jańbyr jaýdyratyn bult júıelerin qurý, jeldiń sıpatyn ózgertip, belgili bir aımaqqa sý býyn ákelý nemese qaýipti tabıǵı qubylystardy tolyǵymen joıý múmkin emes. Osy turǵyda bulttar geografııalyq bir aımaqtan ekinshi aımaqqa tek tabıǵı jolmen ǵana tasymaldanatynyn nemese qurylatynyn habarlaımyz" delingen mekeme habarlamasynda.