Abaı oblysynda «Taza Qazaqstan» baǵdarlamasy aıasynda is-sharalar ótýde

Abaı oblysynda «Taza Qazaqstan» baǵdarlamasy aıasynda abattandyrý jáne ekologııalyq mádenıetke arnalǵan is-sharalar ótýde dep jazady Qamshy.kz aqparat agenttigi. 

Memleket basshysynyń bastamasymen «Taza Qazaqstan» aksııasynyń aıasynda Abaı oblysy kóleminde kóshelerdi abattandyrý, jınaý, tazalaý jáne t.b. aýqymdy is-sharalar ótti.

Aksııa barysynda saıabaqtar men qoǵamdyq oryndardy abattandyrýǵa erekshe kóńil bólindi. Semeı qalasynda Naımanbaev-Momyshuly kósheleriniń jol aıryǵynda tarıhı qıylys ashylyp, qala turǵyndary men qonaqtaryn qyzyqtyratyn jańa orynǵa aınaldy. Jobaǵa tarıhı ǵımarattar men sáýlet eskertkishterin qalpyna keltirý, nysandardyń tarıhı qundylyǵyn saqtaý úshin zamanaýı materıaldardy paıdalana otyryp, olardyń bastapqy kelbetin qalpyna keltirý kiredi. Oǵan qosa, qaýipsiz ınfraqurylym damyp, kólik qoljetimdiligi jaqsaryp, jaıaý júrginshiler úshin qolaıly aımaqtar, jaryqtandyrý, avtokólik turaqtary jabdyqtalǵan.

Semeı qalasynyń Qurmetti azamaty Zeınolla Toqaev «Taza Qazaqstan» baǵdarlamasynyń qoǵam mádenıetin damytýdaǵy mańyzyna toqtaldy. Halyq aldynda turǵan basty mindetterdiń biri – tarıhı jol aıryǵynyń jaǵdaıyn saqtaý.

«Semeıde qalamyzdyń tarıhı oqıǵalaryn baılanystyratyn taǵy bir qoǵamdyq keńistik ashyldy. Bizdiń maqsatymyz – ony jaqsy jaǵdaıda saqtaý. О́ıtkeni, mundaı oryndar mádenı jáne tabıǵı muralarymyzdy saqtaýda mańyzdy ról atqarady. Ol úshin «Taza Qazaqstan» baǵdarlamasy aıasyndaǵy jumystardy jalǵastyrý mańyzdy. Ekologııalyq máseleler men abattandyrý birjola sheshilmeıdi, olar únemi qoǵam nazary jáne kúsh salýdy talap etedi. Bul baǵdarlamanyń jalǵasýy turǵyndar arasynda ekologııalyq mádenıetke, balalardyń da, eresekterdiń de tabıǵatqa uqypty qaraýyna da yqpal etedi» - dedi Zeınolla Toqaev.

Sondaı-aq, oblystyń basqa da aýdandarynda abattandyrý jumystary jalǵasyp jatqanyn aıta ketken jón. Besqaraǵaı aýdanynda «Taza aýdan» aksııasy aıasynda aýmaqtardy tazalaýǵa barlyq aýyldyq okrýgter atsalysty. Oǵan 100-den astam adam qatysty. Abaı aýdany Qaraýyl aýylynda da «Taza saıabaq» aksııasy ótti.

Aıagóz aýdanynda «Taza Qazaqstan» baǵdarlamasy aıasynda qala saıabaqtaryn qoqystan tazartý jumystary júrgizildi. Aksııaǵa «Jasyl el» eńbek jasaǵynyń 50-den astam jaýyngeri men týǵan jerdiń tazalyǵyn saqtaýǵa, abattandyrýǵa úles qosqysy keletin mekeme qyzmetkerleri qatysty. Aksııa Abaı Qunanbaev atyndaǵy saıabaqta bastalyp, Quttybaı bı saıabaǵynda aıaqtaldy.

Jańasemeı aýdanynda sý aıdyndaryn abattandyrý jumystary júrgizildi. Osylaısha Muqyr kóliniń mańyndaǵy aýmaq tazartylyp, oǵan jergilikti turǵyndar men jastar qosyldy.

«Taza Qazaqstan» baǵdarlamasy naǵyz otansúıgish jandardyń jumyla atsalysqan bastamasyna aınaldy. Jalpy, Abaı oblysy boıynsha baǵdarlama bastaý alǵan sátten bastap 93 120 adam, onyń ishinde 3616 uıym men mekeme ókilderi qatysty. Tazalyq jumystaryna 2063 birlik tehnıka jumyldyryldy. Nátıjesinde 87 446 aýla tazalanyp, 55 109 tonna qoqys qatty turmystyq qaldyqtar (QTQ) polıgondaryna tasymaldandy.

Oblys kóleminde 239 saıabaq pen skver tazartylyp, 296 eskertkishtiń aınalasy abattandyrylyp, 724 sharshy metr taqtatas jol jóndeldi. 135 540 aǵash jáne 8 622 kóshet otyrǵyzyldy. Tazalyq sharalary 1062 áleýmettik jáne 2248 óndiristik nysandy, sondaı-aq 870 sý qoımasyn, onyń ishinde jasandy sý qoımasyn da qamtydy.