Qazan qalasynda Abaı oblysynyń mádenıet kúnderi ótýde: Qazaqstan men Tatarstan baılanystaryn nyǵaıtpaq

7-9 qarasha aralyǵynda Qazan qalasynda Abaı oblysynyń mádenıet kúnderi ótýde. Shara eki jaqyn halyqtyń ónerin, salt-dástúrin, jetistikterin bir alańda toǵystyrdy. Oblys ákimi Nurlan Uranhaev bastaǵan Abaı oblysynan kelgen delegasııa mádenı tájirıbe almasý maqsatynda Tatarstannan kelgen áriptesterimen kezdesti. Sapar aıasynda delegasııa Qazan qalasynda Qazaqstan Respýblıkasy kúnine oraı qazaqtyń uly aqyny Abaı Qunanbaevtyń eskertkishine gúl shoqtaryn qoıdy.

Abaı oblysy men Tatarstannyń yntymaqtastyǵy keń aýqymdy máselelerdi, ekonomıkalyq jáne mádenı salany qamtıdy. Semeı qalasynda tatar óner mektebi jumys isteıdi, sondaı-aq tatardyń uly aqyny Gabdýlla Týkaıdyń eskertkishi men halyq batyry Mýsa Djalıldiń bıýsti bar.

«Tatarstan Respýblıkasy – dástúr men qazirgi zaman, mádenıet pen ınnovasııa, babalar danalyǵy men bolashaqqa umtylys toǵysqan biregeı meken. Abaı óńiri túrli salalarda ekijaqty qarym-qatynastardy damytý boıynsha belsendi jumys atqarýda. Bizge erekshe mıssııa – Tatarstannyń zamanaýı jetistikterimen tanysý jáne saýda-ınvestısııalyq yntymaqtastyqty damytý, óıtkeni óńirler arasyndaǵy tyǵyz dostyq baılanystar tarıhı ótkenge, ortaq salt-dástúrge baılanysty», – dedi oblys ákimi Nurlan Uranhaev.

Mádenı kúnderdiń basty oqıǵalarynyń biri – «Jıdebaı-Bórili» qoryq-mýzeıiniń uıymdastyrýymen Qazan Kremlinde «Adamzattyń bárin súı baýyrym dep...» atty kórmeniń ashylýy boldy. Kórmede Abaı Qunanbaev, Shákárim Qudaıberdiuly jáne Muhtar Áýezov syndy qazaq mádenıetiniń uly tulǵalarymen baılanysty biregeı jádigerler toptastyrylǵan.

Mádenı kúnder Kenjegúl Aqshekınanyń jetekshiligimen Abaı oblysy ákiminiń estradalyq-sımfonııalyq orkestriniń ónerimen de erekshelendi. S.Saıd-Galıev atyndaǵy Mádenıet saraıynda ótken konsertte qazaq, orys jáne tatar tilderinde usynylǵan qazaq jáne tatar mýzykasynyń týyndylary oryndaldy. Konsertke Maprýza Ýtýlenova men Erlan Rysqalı syndy Qazaqstannyń eńbek sińirgen mádenıet qaıratkerleri, ánshi Tólegen Rahymbaev jáne basqa da óner qaıratkerleri qatysty. Sonymen qatar, Galıasgar Kamal atyndaǵy Tatar memlekettik akademııalyq teatrynda Ámire Qashaýbaev atyndaǵy memlekettik fılarmonııanyń uıymdastyrýymen merekelik konsert ótti. Nurlan Tókeıdiń jetekshiligimen qazaq halyq aspaptar orkestriniń oryndaýyndaǵy baǵdarlamada Latıf Hamıdı, Ahmet Jubanov jáne Nurǵısa Tilendıev syndy qazaq kompozıtorlarynyń shyǵarmalary oryndaldy.

Sonymen qatar, Mádenıet kúnderi aıasynda kitap kórmeleri, qazaq tilinen sheberlik synyptary jáne basqa da is-sharalar ótkizildi. Qazaqstan men Tatarstan mádenıetaralyq ózara is-qımyldyń jarqyn úlgisi bolyp, mádenı baılanysty nyǵaıtýdy jalǵastyrady.