Naýryzbaı aýdanyna 10 jyl: Almatynyń eń jas aýdany qalaı damýda

Dınamıkalyq damý jáne kópjyldyq   problemalardy sheshý: Erbolat Dosaev Naýryzbaı aýdanynyń turǵyndarymen kezdesti.

Almaty ákimi Erbolat Dosaev bıyl 10 jasqa tolatyn Naýryzbaı aýdanynyń turǵyndarymen kezdesý ótkizdi. Qala basshysy megapolıstiń eń jas aýdanynyń qarqyndy áleýmettik-ekonomıkalyq damýyn atap ótip, turǵyndardyń suraqtaryna jaýap berdi.

Máselen, 2024 jyly aýdan bıýdjeti 23 mlrd teńgeni qurady. Birinshi jartyjyldyqta jumys istep turǵan bıznes sýbektileriniń sany 15% - ǵa ósip, salyq túsimi 60% - ǵa, 25 mlrd teńgege deıin ósti. 1 800 jańa turaqty jumys orny qurylyp, 100 myń sharshy metrden astam turǵyn úı paıdalanýǵa berildi.

Aýdandaǵy ózekti máselelerdiń biri turǵyndardy úzdiksiz sýmen jáne sý burýmen qamtamasyz etý bolyp qala beredi. Osyǵan baılanysty Aqjar, Qaraǵaıly shaǵyn aýdandarynda jańa ınjenerlik jeliler salynýda. Naýryzbaı aýdany men Almaty oblysyndaǵy eki aýyldyń 200 myńnan astam turǵynyn sapaly sýmen qamtamasyz etetin «Qarǵaly» jáne «Aqsaı» sý qoımalarynyń qurylysy boıynsha aýqymdy jobalar aıaqtalýǵa jaqyn.

Búginde qalaǵa qosylǵan aýdanda elektr jelileriniń 85% - y tozǵan. Aýdandy turaqty elektrmen jabdyqtaýmen qamtamasyz etý úshin alty shaǵyn aýdanda elektr jelilerin rekonstrýksııalaý júrgizilýde. Nátıjesinde jelilerdiń tozýy 30% - ǵa azaıady.

Jol-kólik ınfraqurylymyn damytýǵa qatysty qala ákimi bıyl aýdannyń 110 kóshesindegi 50 myń sharshy metr jol aǵymdaǵy jóndeýmen qamtylǵanyn habarlady. Qarasha aıynyń sońyna deıin 150 kóshedegi taǵy 20 myń sharshy metr joldy jóndep, Abaı dańǵylyn Stroıtelnaıa kóshesinen qala shekarasyna deıin uzartýdy aıaqtaý josparlanýda.

Jyl basynan beri 150 avtobýs jańartylyp, 12 jańa aıaldama pavılony ornatyldy.

Aýdanda oqýshy oryndarynyń jetispeýshiligi máselesin sheshý úshin 5 jańa mektep salynady: olardyń biri qyrkúıek aıynda ashylady, qalǵandary - bıylǵy jyldyń sońyna deıin.  №174 mektepke qosymsha qurylys júrgizilýde. Aǵymdaǵy jyldyń qyrkúıek aıynda Shuǵyla sh/a-da balabaqshany paıdalanýǵa berý josparlanýda. Jyl sońyna deıin taǵy eki jańa balabaqsha salynady.

Sapaly medısınalyq qyzmet kórsetý úshin Quramys, Shuǵyla sh/a-da eki jańa emhana, sondaı-aq Aqjar sh/a dárigerlik ambýlatorııa salynady.  Sonymen qatar, aýdanda erekshe qajettilikteri bar adamdarǵa beıimdelgen basseıni men sport seksııalaryna arnalǵan zaldary bar alǵashqy deneshynyqtyrý-saýyqtyrý kesheni paıda bolady.

Abattandyrý týraly aıta kele, megapolıs basshysy selden qorǵaý bógetinen Jandosov kóshesine deıingi jańa qoǵamdyq keńistik qurylatyn ýchaskeni atap ótti. Sondaı-aq, turǵyndardyń ótinishi boıynsha Shuǵyla shaǵyn aýdanynda jańa jaıaý júrginshiler aımaǵy abattandyrylady.