13 Maýsym, 2024 Mádenıet
![](/media/2024/06/13/crop-38_173_857x1523_whatsapp-image-2024-06-13-at-15.25.43-2.jpeg?width=600&height=480)
Foto: Maqsat Qusaıyn
«Aqsaq qulan» ańyzyna qaraǵanda, Joshynyń ólimi aqsaq qulannan bolǵan eken. Qaraly habardy da han Shyńǵysqa Ketbuǵa jyraý estirtken. Osy ańyz ben kúı sarynyn bala kezden estip óspegen qazaq joq shyǵar.
12 maýsymda sol ańyz «Alataý» dástúrli óner teatry sahnasynda jańasha baıandaldy.
Avtory – Ardaq Berkimbaev, qoıýshy sýretshi – Qýat Tústikbaev, plastıka rejısseri – Ádilet Tamenov.
Ańyzǵa negizdelgen feerııa janryndaǵy jańasha qoıylymnyń rejısseri – Arýhan Temirbekqyzy. Premera aldynda ótken baspasóz máslıhatynda BAQ ókilderine bergen suhbatynda jas rejısser bul týyndyny óziniń alǵashqy jumysy ekenin aıtty. Halyq ańyzyn tamasha plastıka, sazdy áýen, vızýaldy áserdiń kómegimen kórermenge jetkizýdi kózdegen rejısser aldyna qoıǵan maqsatyna jete aldy dep oılaımyz. Munda ásirese plasıtkalyq rejısser Ádilet Tamenovtyń eńbegi zor. Han balasynyń ańǵa shyqqanyn, dúsirletip qulan qýǵanyn, sadaqpen atyp qulan balasyn óltirgenin, ana qulannyń balasynyń ólimine qan juta qaıǵyrǵanyn, han ulynyń mert bolýyn únsiz baıandap, sózsiz áńgimelep bergen teatr ártisteriniń, bıshileriniń qabileti tań qaldyrdy.
Qoıylymnyń sharyqtaý shegi – hanǵa ulynyń ólimi jaıly habardy esittirýi. «Balam óli me, tiri me?» – dep nókerlerine kezek-kezek qaraǵan hannyń aldynda jas Ketbuǵa tizerlep otyra qalady da, qara dombyrany bezildete jóneledi. «Aqsaq qulan» kúıi. Han uly óliminiń revkıemi. Qaıǵyly kúı kúńirene estiledi. Dombyra beınebir tiri jandaı: «ulyń óldi, mert boldy» dep turǵandaı.
Kúmbirlegen túrli aspap úni, qoıylymǵa ár bergen jandy dybys – munda «Alataý» etno-folklorlyq ansambliniń sheberligin de atap ótken jón.
Spektakl 13 maýsym kúni taǵy qoıylady.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir