Damyǵan elderde - 4-5 pán, Qazaqstanda 16 pán oqytylady - Senator

Senator Altynbek Nýhuly eldegi oqýshylardyń shamadan tys oqý júktemesi týraly másele kóterdi. 

-Búgingi kúni sapaly bilim berý jaǵynan ozyq elder Japonııa, Ońtústik Koreıa, Fınlıandııa jáne Kanada sııaqty elderde mektep oqýshylary 7-8 synypta naqty ǵylym salalaryna qatysty 4-6 pán oqysa, al Qazaqstanda 15 pán, al 9 synypta tipti 16 pán oqytylady. Bizde mindetti oqý pánderiniń sany 2,5 ese kóp. Mundaı shamadan tys pánderdiń jalpy sany álemdegi birde-bir damyǵan elde joq. Bizde hımııa, bıologııa, geografııa sııaqty oqý pánderi jeke-jeke pán retinde 578 saǵat kóleminde, al atalǵan memleketterde osy pánder toptastyrlyp, bir ǵana "Ǵylym" páni dep oqytylyp, 324 saǵatty qraıdy.  Soǵan qaramastan, sońǵy 15 jyldaǵy halyqaralyq PISA zertteýiniń qorytyndysy boıynsha osy elderdegi oqýshylardyń jaratylystaný ǵylymy boıynsha saýattylyǵy joǵary bolyp otyr", - dedi ol óziniń depýtattyq saýalynda.  

Senat depýtaty mekteptegi mindetti pánder sanynyń shamadan tys kóp bolýyna sýbektıvti faktorlar áser etkenin aıtty.

-Qazaqstanda mektep oqýshylaryna taqyryp boıynsha shamadan tys kólemdi aqparat beriledi jáne oqýlyqtardyń tili aýyr ári ǵylymı sıpatta beriledi. Ozyq eldiń taǵy biri – Ulybrıtanııada kerisinshe aqparat kólemdi emes, taqyryptar tájirıbege baǵyttalyp, kúndelikti ómirdiń jaǵdaıattarymen baılanystyrylyp oqytylady. Basqasha aıtqanda, oqýshynyń aldaǵy ómirinde pragmatıkalyq turǵydan qanshalyqty mańyzdy ekenin túsindirýge kóp kóńil bólinedi, ıaǵnı oqýshylardyń quzirettiligin qalyptastyratyn nátıjege baǵdarlanǵan bilim beriledi. Orta bilim berý salasynda sapaly bilim berý úshin, oqýshylarǵa zaman talabyna saı bilim berý mazmunyn jasaý kerek. Orta bilim berý sapasyn kóterýdiń Konsepsııasyna sáıkesinshe ózgerister engizilýi kerek dep esepteımiz, - dedi Altynbek Nýhuly.