Depozıt sııaqty dep oıladyq: Jusan Invest klıentteri mıllıondaǵan aqshalaryn joǵaltqan

2021 jyly salymshylar qurylymdyq notalardy satyp alǵan edi. Alaıda 2023 jyldyń kókteminde bul qarjylyq quraldardyń quny kenetten 70%-dan 90%-ǵa deıin tómendegen. Dál osy kezde kotırovkalardy (baǵa belgileý) baqylaýǵa bolatyn qosymsha istemeı qalǵan. Nátıjesinde, adamdar qundy qaǵazdaryn der kezinde sata almaı, óz qarajattarynan aıyrylǵan.

Qarajatty saqtap, kóbeıtemiz dep josparlaǵan klıentter, kerisinshe, jınaqtarynan aıyryldy. Jusan Invest klıentteriniń aıtýynsha, broker qurylymdyq notalardy 12% jáne odan joǵary tabyspen depozıt retinde usynǵan. Sonymen qatar baǵanyń tómendeýinen saqtandyrý qorǵaýy da bar dep kórsetilgen.

Japa shekkenderdiń biri – Qýat Dombaı bir sátte 10 mıllıon teńgeden astam qarajatyn joǵaltty. Qurylymdyq notalardyń quny quldyraǵan kezde, ol aksııalardyń baǵasyn ýaqytynda bile almaǵan.

"Bizdi ashyq túrde adastyrdy. Bul qarjylyq quraldardyń ózekti baǵasy bar ekenin bildik, biraq biz olarǵa depozıt retinde qaradyq. Bizge solaı túsindirdi. Eger men satyp alǵan sátten-aq olardyń baǵasy tómendeýi nemese kóterilýi múmkin ekenin bilgenimde der kezinde shara qoldanar edim”, – deıdi ol.

Barlyq klıentter qarjylyq saýatty adamdar, biraq olarǵa naqty qaýipter týraly eskertpegen deıdi zańger.

"Bul jerde “Adamdardy aldaǵan ba?"degen suraq týyndaıdy. О́ıtkeni olar qaǵazdardyń naqty quny qansha ekeninen beıhabar bolǵan. Bul suraqqa jaýap bolǵan joq. Tek baǵany ózderińiz qadaǵalaýyńyz kerek edi degen jaýap qana berildi”, – deıdi zańger Aıdar Qashqarbaı. 

Qarjylyq naryqty retteý jáne damytý agenttigi tekserý nátıjesinde 82 ákimshilik quqyqbuzýshylyq týraly hattama toltyrǵan. Jusan Invest brokerlik kompanııa klıentteri ınvestısııalyq qaýipter týraly habardar etilgen dep jaýap berdi.

"Atalmysh qurylymdyq notalar – joǵary táýekeldi qural, oǵan 20%-ǵa deıingi jyldyq paıyzdyq mólsherlemeler dálel. Bul – Qazaqstannyń ekinshi deńgeıli bankterindegi depozıtterdegi 1% tabyspen salystyrǵanda joǵary kórsetkish. Qurylymdyq notalar iri halyqaralyq bankter tarapynan shyǵarylǵan, al Jusan Invest tek osy qarjylyq quraldardy satyp alý boıynsha brokerlik qyzmetter kórsetken”, – delingen qarjylyq naryqty retteý jáne damytý agenttiginiń málimdemesinde.

Klıentter brokermen beıbit kelisimge kelemiz dep úmittenedi. Eger nátıje bolmasa, olar sot organdaryna júginbek.