Depýtat zeınet jasyna jetkenderge járdemaqyny toqtatpaı bere berýdi usyndy

Depýtat Premer-mınıstrdiń orynbasary Tamara Dúısenova joldaǵan saýalynda osyndaı usynys jasady.

Qazaqstanda áleýmettik álsiz toptar jyldan jylǵa kóbeıip jatyr. Qaraýsyz qalǵan qarttar, asyraýshysynan aıyrylǵan kóp balaly otbasylar, álde kimniń jaýapsyzdyǵynan jalǵyz qalǵan jalǵyz basty analar, taǵysyn taǵy tizbekteı berýge bolady. Biraq solardyń ishindegi eń qorǵansyzy dep táni de, jany da jaraly – múgedektigi bar jandardy aıtýǵa bolady. Múgedektigi bar jandar zeınet jasyna kelgende ne zeınetaqy, ne járdemaqyny tańdaýǵa májbúr, - deıdi depýtat.

Onyń sózinshe, jumyspen qamtylmaǵan adamnan zeınetaqy qoryna esh qarjy túspese, zeınetaqysy da az bolady.

Eńbek ótili 1998 jyldan bastap jumys istegen múgedek azamattarǵa, zeınetke shyqqanda tek zeınet aqy qorynda jınalǵan qarajat qana bólinip beriledi. Ol degenimiz, qorǵa qarajat aýdarmaıtyn múgedek jan eshteńesiz qalady degen sóz. Iıa sizder “múgedek ózdiginen erikti túrde qarajat aýdarý kerek” dep aıtasyzdar, biraq 95 myń teńge járdemaqy alatyn múgedek nesin aýdarady? Demek bul múgedek zeınetaqysyz qalady degen sóz. Sonda qalaı? Sizderdiń oılaryńyzsha, zeınetke shyqqan múgedek qartaıǵan shaǵynda qulan taza saýyǵyp kete me? – dep surady ol.

Depýtat Tańsáýle Serikov atap ótkendeı, III top sanattaǵy múgedek adamnyń ózi ne qoly, ne aıaǵy joq adam.

Búginde I top 95 496 teńge, II top 79 435 teńge, III toptaǵy múgedekter 69 886 teńge járdemaqy alady eken. Sol sebepti áleýmettik kodekske ózgertýler engizý arqyly osy járdemaqymen zeınetaqyny qosa berý kerek. Ondaı bolmaǵan jaǵdaıda eńbekke qabiletti múgedekterdi jumyspen qamtý qajet. Qazaqstan Respýblıkasy Úkimetiniń 2019 jylǵy mamyr aıyndaǵy №326 qaýlysy boıynsha Qazaqstan Respýblıkasynda múgedektigi bar adamdardyń quqyqtaryn qamtamasyz etý jáne turmys sapasyn jaqsartý jónindegi ulttyq jospary 2025 jylǵa deıin bekitilgen. Sonda múgedektigi bar jandardyń jaǵdaıyn 2025 jylǵa deıin jaqsartqan túrimiz osy ma? Nege bizde múgedektigi bar adamdardyń máselesin aıtqanda ol baıaý iske asady? – dedi ol.