• USD 468.56

  • EUR 497.56

  • RUB 7.3

  • CNY 67.18

18 Qazan, 09:54:43
Almaty
+9°

 

Almatynyń tasymaldaýshylary taǵy bir bastama kóterdi. Jolaýshylar tasymaly kásiporyndary qaýymdastyǵynyń habarlaýynsha, avtobýs parkteri Almaty ákimdiginen qoǵamdyq kólikte qolma-qol tólemdi joıýdy qarastyrýdy suraıdy.

Negizgi dálel – júrgizýshilerdiń qolma-qol aqsha qabyldaýy olardy negizgi qyzmetten alańdatady, bul jolaýshylardy tasymaldaý kezinde qaýipsizdikti qamtamasyz etýge teris áser etedi. Sonymen qatar, kóleńkeli ekonomıkaǵa jaǵdaı jasaıdy, óıtkeni júrgizýshilerdiń bılet bermeı qoıatyny bar.

«Talap T» JShS avtobýs parkiniń dırektory Serik Jumabekovtyń aıtýynsha, qolma-qol aqshamen tóleýdiń úlesi az, biraq úlken qaýip týǵyzady.

«Qala joldaryndaǵy qozǵalys qıyn, kólik sany artyp keledi, soǵan sáıkes qoǵamdyq kólik júrgizýshilerine úlken jaýapkershilik júkteledi. Jol aqysyn qabyldaý júrgizýshilerdi avtobýsty júrgizý syndy tikeleı mindetinen alańdatady jáne bul jolaýshylarǵa ǵana emes, jol qozǵalysynyń ózge de múshelerine qaýip tóndiredi. Keıde qolma-qol aqshamen tóleý júrgizýshiniń 2 mınýtqa deıin ýaqytyn alady, sebebi qaıtarym tabý kerek jáne t.b. Sondaı-aq, júrgizýshilerdiń qolma-qol aqsha qabyldaý kezinde jolaýshylarmen janjal da jıi týyndaıdy», - deıdi Serik Jumabekov.

О́z kezeginde «Neo City Trans» JShS avtobýs parkiniń dırektory Erkin Nurpeıisov qolma-qol tólemge baılanysty tasymaldaýshylar tıisti tabys tappaıdy, naqty jolaýshylar sanyn anyqtaı almaıdy dep esepteıdi.

«Avtobýstaǵy beınebaqylaý kamerasyndaǵy jazbalarǵa monıtorıng júrgizý jáne júrgizýshilerdiń jolaqysyn qolma-qol aqshamen berýin anyqtaý qajet. Keıde júrgizýshi qolma-qol aqsha alyp, jolaýshyǵa bılet bermeıdi. Biraq kúni boıy ár reısti kórý múmkin emes. Munyń bári sýbsıdııalaý kólemine áser etedi, sondyqtan park shyǵynǵa ushyraýǵa májbúr. Biz tasymaldaýshylar ekonomıkasynyń ashyqtyǵyn qamtamasyz etetin jáne qalada qoǵamdyq kólikti damytý úshin qolaıly jaǵdaı jasaıtyn qoǵamdyq kólikte qolma-qol aqshamen tólemdi joıý qajet dep sanaımyz. Bul úshin «Onay» kartasy jáne onyń qosymshasy nemese SMS arqyly tóleýge bolady», - dedi ol.

Almaty kólik holdınginiń málimetinshe, bıyl jyl basynan beri qoǵamdyq kólikte 183 mln.tranzaksııa jasalsa, sonyń 1,6%-y ǵana qolma-qol aqshamen tólengen.

Qoǵamdyq kólik júıesi damyǵan elder qolma-qol tólemnen áldeqashan bas tartqan. Mysaly, Nıý-Iorkte jolaqysyn tek plastıkalyq kólik kartasymen tóleýge bolady. Japonııa, Shveısarııa, Kanada qalalarynda osyǵan uqsas júıe qoldanylady.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir