Májilis spıkeri Prezıdenttiń HI Azamattyq forým qatysýshylaryna arnalǵan úndeýin oqyp berdi

Májilis Tóraǵasy Erlan Qoshanov Qazaqstannyń HI Azamattyq forýmynyń jumysyna qatysyp, Memleket basshysy Qasym-Jomart Toqaevtyń forým qatysýshylaryna arnalǵan quttyqtaý sózin oqyp berdi.

Memleket basshysy óz úndeýinde qatysýshylardy quttyqtap, 20 jyl ishinde bul forýmnyń tıimdiligi men qajettiligi dáleldenip, salmaqty oılar men salıqaly pikirler aıtylatyn alańǵa aınalǵanyn atap ótti.

Qazaqstanda júrgizilip jatqan aýqymdy ózgerister qoǵamda jańa etıka qalyptastyrýdy talap etedi. Osy oraıda ádildik pen gýmanızm, ózara senim men jaýapkershilik, zań men tártip, eńbekqorlyq pen bilimpazdyq jańa etıkanyń ózegi bolýǵa tıis. Memleket pen úkimettik emes sektordyń tyǵyz yntymaqtastyǵy elimizdi jan-jaqty damytýǵa yqpal etip, Ádiletti Qazaqstandy qurýǵa jol ashady dep senemin, – delingen Prezıdenttiń quttyqtaýynda.

Májilis Spıkeri Prezıdenttiń bastamasymen elimizde memlekettik bılik ınstıtýttaryn jetildirýge jáne azamattyq qoǵamnyń damýyna baǵyttalǵan reformalar júzege asyrylyp jatqanyn atap ótti. Ol úkimettik emes uıymdar Memleket basshysynyń barlyq mańyzdy bastamalarynyń draıveri jáne eldegi demokratııalyq ózgeristerdiń baıandy bolýynyń kepili bolýǵa tıis ekenin atap ótti.

– Prezıdent azamattyq qoǵamdy memlekettiń eń ózekti mindetterin talqylaýǵa tartý qajettigin birneshe ret atap ótti. Sondyqtan bizdiń maqsatymyz – qoǵamdy tolǵandyratyn barlyq pikirtalastardy Parlament qabyrǵasynda talqylaý. Májilis janynda úkimettik emes uıymdar, sarapshylar men ǵalymdarǵa túrli másele boıynsha óz ustanymdaryn tanystyrýǵa múmkindik beretin Qoǵamdyq palata jumys isteıdi. Otyrystardyń birin elimizdegi azamattyq sektordy damytýǵa arnaǵan jón dep sanaımyn, – dedi Májilis tóraǵasy.

Sondaı-aq  Erlan Qoshanov búginde Májiliste zań shyǵarý jumysy barysynda qoǵamdyq pikir eskeriletinin aıtty. Palata spıkeri mysal retinde azamattarǵa memleket basqarý isine qatysýǵa jańa múmkindikter berip, petısııalar ınstıtýtyn engizgen Qoǵamdyq baqylaý týraly zańnyń qabyldanǵanyn atap ótti.

Májilis tóraǵasy barlyq zań shyǵarý prosesiniń ashyqtyǵy búginde depýtattar jumysynyń basty prınsıpi jáne onsyz qoǵamnyń senimine qol jetkizý múmkin emes ekenine nazar aýdardy. Sonymen qatar azamattyq belsendilerdi Májilistiń zań shyǵarý jumysyna atsalysýǵa shaqyrdy.

Qazaqstannyń XI Azamattyq forýmy Astanada 600-den astam adamdy, onyń ishinde Ortalyq Azııa elderinen kelgen delegattardyń basyn qosty. Is-sharada belsendiler, úkimettik emes uıymdardyń kóshbasshylary, memlekettik organdar men bıznes-qoǵamdastyqtardyń ókilderi el damýynyń jáne jahandyq syn-qaterlerdi eńserýdiń ózekti máselelerin talqylaıdy.