Qoshanov: Máshhúr Júsip Kópeevtiń óleńderi men kósemsózi qazaq rýhanııatynyń altyn qorynan oıyp turyp óz ornyn aldy

Májilis tóraǵasy Erlan Qoshanov Memleket basshysynyń tapsyrmasymen Máshhúr Júsip Kópeevtiń 165-jyldyq mereıtoıyna arnalǵan saltanatty is-sharaǵa qatysty.

Alqaly jıyn Pavlodar oblysy Baıanaýyl aýdanynda ótti.

Májilis spıkeri Prezıdent Qasym-Jomart Toqaevtyń quttyqtaý hatyn oqyp berdi.

– Máshhúr Júsip Kópeıuly halqymyzdyń aýyz ádebıetin, shejireli tarıhyn jáne salt-dástúrin jan-jaqty zerdelep, ult rýhanııatyn damytýǵa ólsheýsiz úles qosty. Halyqty óner-bilimge shaqyrǵan óleńder men tolǵaýlar, dastandar men qıssalar jazyp, tól ádebıetimizdiń kókjıegin keńeıtti. Uly oıshyldyń mol murasy áli de talaı urpaqtyń qajetine jarary sózsiz. «Salǵan meni beınetke ǵylym-bilim» dep aqynnyń ózi jyrlaǵandaı, tereń tanym men telegeı bilimniń arqasynda elge tanymal bolyp, «Máshhúr» atanǵan abyzdy ulyqtap, eńbekterin jurttyń jadynda jańǵyrtý – barshamyzdyń ortaq paryzymyz, – delingen Prezıdent quttyqtaýynda.

Erlan Qoshanov Ertis-Baıanaýyl ólkesi ultymyzdyń taǵdyry men tarıhyna óshpes iz qaldyrǵan uly perzentterdi dúnıege ákelgen kıeli topyraq ekenin atap ótti. Solardyń biri de, biregeıi – Máshhúr Júsip Kópeıuly.

Májilis tóraǵasy aqyn óleńderi men kósemsózi qazaq rýhanııatynyń altyn qorynan oıyp turyp oryn alatynynaıtty.

– Ol kezde zaman qandaı bolǵanyn bilemiz. Sol alasapyran ýaqyttyń ózinde qanshama shejireni, dastan-qıssalardy, ertegilerdi, aıtys úlgilerin kóziniń maıyn tamyzyp otyryp jınaǵany erlikke para-par, – dedi Májilis tóraǵasy.

Sóz sońynda Májilis spıkeri Erlan Qoshanov Máshhúr Júsip Kópeıulynyń esimi men mol murasy halqymyzben birge máńgi jasaı beretinin erekshe atap ótti.

Mereıtoı aıasynda oblysta respýblıkalyq aqyndar aıtysy, jyrshy-termeshiler baıqaýy, kókpar, báıge men qazaq kúresinen jarys ótti.

Májilistiń Baspasóz qyzmeti