ALMATYDA «DÁSTÚR KERÝENI» ShARASY О́TTI

Sharanyń ashylý saltanatynda alǵysóz sóılegen Almaty qalasynyń bas ımamy Tólebı Ospan almatylyqtarǵa Bas múftı Naýryzbaı qajy Taǵanulynyń ystyq sálemin jetkizip, mýftııat qabyrǵasyndaǵy salt-dástúrdiń nasıhattalý barysyna toqtaldy. Sharaǵa «Nur-Múbarak» Egıpet ıslam ýnıversıtetiniń rektory, professor Ahmed Hýseın Muhammed Ibrahım, jazýshy, aqyn Aqberen Elgezek jáne sportshylar, meshit aqsaqaldary men jamaǵattary jáne qala ımamdary qatysty.

«Bas múftı bastamasymen Ulttyq mereke qarsańynda «Dástúr kerýeni» sharasy ótýde. Búgin – jastar ulttyq oıyndardan ózara baq synaıdy. Sondaı-aq, ulttyq buıymdar men halal ónimder kórmesi de sizderdiń nazarlaryńyzǵa usynylmaq.

Jigittiń quny júz jylqy, ary myń jylqy degen qazaq. Demek, biz úshin baǵa jetpes qundylyq, adam jáne onyń qadir-qasıeti hám ar-namysy. Jýyrda QMDB qoǵamdaǵy qatigezdik jaǵdaılarǵa baılanysty el musylmandaryna úndeý jarııalady. Úndeýde – barsha azamatty ózara baýyrmal, keshirimdi, meıirimdi bolýǵa úndep, qatigezdik isterge jol bermeýge shaqyrady. Sol sebepti, bir-birimizdi renjitip alýdan, kisiniń kóńiline qaıaý túsirýden, adamnyń aqysyna kirýden uzaq bolaıyq», - dep atap ótti bas ımam Tólebı Ospan.

Almaty ıppodromynyń atshabarynda «Topjarǵan» etno-mádenı ortalyǵynyń ónerpaz ul-qyzdary teńge ilý, aýdaryspaq, sadaq atý, jamby atý jáne at ústindegi akrobatıka ónerlerin kórsetti. Sondaı-aq jınalǵan qala turǵyndary men qonaqtary kókpar, qazaqsha kúres, qol kúres, gir tasyn kóterý, asyq atý, arqan tartý jáne toǵyzqumalaq syndy sporttyq oıyndar saıysyn tamashalady. Jalpy júlde qory – 2 500 000 teńgeni quraıdy. 

Ippodrom kireberisinde halal ónimder men ulttyq buıymdar kórmesi uıymdastyryldy. Sáni men sapasy joǵary qazaqy kıimderdi kıip kórip, sol jerde satyp alýǵa múmkindik aldy. Kórmede aǵashtan oıyp jasalyp, naǵyz sheberdiń qolynan shyqqan túrli dombyralar, temir ustasy jasaǵan buıymdardy tamashalady. «MUFTYAT» baspasynan shyqqan kitaptar da kórmege kórik qosty.

Al basty erekshelik Paıǵambarymyzdyń (oǵan Allanyń salaýaty men sálemi bolsyn) ómir jolymen VR tehnologııasy arqyly tanysýy boldy. Sıfrlyq damý baǵytymen vırtýaldy kózildirik arqyly adamzattyń ardaqtysy Muhammed Paıǵambarymyzdyń (oǵan Allanyń salaýaty men sálemi bolsyn) týylǵan sátinen bastap ómir tarıhyna qysqasha mazmunda sholý jasalynǵan. Kórermen erekshe áserlerimen bólisip, jańa tehnologııaly jańalyqqa rızashylyqtaryn jetkizdi.

Sonymen qatar 300 kisige arnaıy dastarhan jaıylyp, kelgen qonaqtarǵa qazaqy dástúr boıynsha tegin dám usynyldy. Ulttyq qundylyqtar nasıhattalǵan atalmysh sharany tamashalaýǵa 2500-den astam adam kelgen.  

«Dástúr kerýeni» sharasynyń basty maqsaty – halyq arasynda din men dástúr sabaqtastyǵyn dáripteý, atadan amanat bop qalǵan ulan baıtaq jerimiz ben dástúrli dinimizdi saqtap, salt-dástúrimizge berik bolýǵa shaqyrý bolyp tabylady.

 Almaty ókildigi boıynsha

baspasóz qyzmeti