SQO-da balalardyń ólimine sebep bolǵan ýlaný deregi: medbıkege qatysty qylmystyq is qozǵaldy

Soltústik Qazaqstan oblysynda 3 jasar jáne 7 jasar balalardyń ólimine sebep bolǵan ýlanýdan keıin medbıkege qatysty qylmystyq is qozǵaldy. 

SQO Polısııa departamentiniń málimetinshe, medısınalyq qyzmetkerge qyzmettik mindetterin tıisinshe oryndamady degen aıyp taǵylǵan.

Aımaqtyq basylym málimetinshe, Soltústik Qazaqstan oblysynda balalardyń ólimine ákelip soqtyrǵan ýlanýǵa qatysty qylmys quramynyń joqtyǵynan sanıtarlyq erejelerdi buzý faktisi boıynsha qozǵalǵan qylmystyq is aıaqtaldy.

Sondaı-aq medısına qyzmetkeriniń eki nemese odan da kóp adamnyń ólimine ákep soqtyrǵan qyzmettik mindetterin tıisinshe oryndamaýy baby boıynsha da jańadan tergeý bastaldy. Atalǵan fakt sotqa deıingi tergep-tekserýdiń biryńǵaı tizilimine "Abaısyzda adamdardyń jappaı ýlanýyna jáne abaısyzda eki nemese odan da kóp adamnyń ólimine ákep soqqan sanıtarlyq erejeler men gıgıenalyq normalardy buzý" baby boıynsha tirkeldi. Alaıda is qylmys quramynyń bolmaýyna baılanysty toqtaǵan.

"Atalǵan qylmystyq is boıynsha materıaldar jeke óndiriske jiberilip, Qazaqstan Respýblıkasy Qylmystyq kodeksiniń 317-baby  4-bóligi ("Medısına nemese farmasevtıka qyzmetkeriniń kásiptik mindetterin tıisinshe oryndamaýy") boıynsha sotqa deıingi tergep-tekserýler bastaldy", –  delingen Soltústik Qazaqstan oblysy Polısııa departamentiniń baspasóz qyzmeti taratqan habarlamada.

Aıta keteıik, buǵan deıin Soltústik Qazaqstan oblysy Qyzyljar aýdanynyń Nadejka aýylynda bir otbasy tamaqtan ýlanyp qalǵany habarlandy. Aýyl dúkeninen tamaq alǵan otbasy keshki as daıyndap, artynsha jatyp qalǵan. Týystarynyń aıtýynsha, aldymen kishkentaı sábı qusa bastaǵan. Artynsha qalǵan eki balanyń hali nasharlaǵan.

Qaıǵyly oqıǵadan bir kún buryn otbasynyń aýyldyq dúkennen óńdelgen taǵamdar jep, gazdalǵan sýsyn ishkeni atap ótildi.

Keıinirek Sanıtarııalyq-epıdemıologııalyq baqylaý departamentinde ýlanýdan eki balanyń óliminiń mán-jaıy men júrgizilip jatqan tergeý jumystary aıtyldy.

Shilde aıynyń basynda polıseıler balalardyń ýlaný sebebin nıtrıtten jedel ýlaný dep tapty.