Semeıde dárigerler skveri ashyldy

Semeıde №1 qalalyq emhana aldynda ornalasqan dárigerler skveriniń saltanatty ashylýy ótti. Is-sharaǵa oblys ákimi Nurlan Uranhaev, dárigerler, densaýlyq saqtaý salasynyń ardagerleri, stýdentter, qala turǵyndary jáne buqaralyq aqparat quraldary ókilderi qatysty.

Jańa skver - jaıly demalys orny ǵana emes, sonymen qatar jergilikti turǵyndardyń belsendi ómir saltyn nasıhattaıtyn keńistik bolmaq. Skver - medısına qyzmetkerleriniń óz isterine adaldyǵy men adam densaýlyǵyn saqtaýda atqaryp otyrǵan ólsheýsiz eńbekterine alǵys pen rızashylyqtyń sımvoly bolady.

Jańa skverdiń jalpy aýdany 6 myń sharshy metrdi quraıdy. Aýmaqty kógaldandyrýǵa erekshe nazar aýdarylyp, qaıyń, sibir shyrshasy, tal, bóriqaraqat, shyrsha, arsha, pıramıda terekteri, vıbýrným jáne taý kúli sııaqty butalardyń kóshetteri otyrǵyzyldy.

Sonymen qatar, sport alańdary men balalar oıyn alańdary da qarastyrylǵan. Skver jaryqtandyrylyp, oryndyqtar, qoqys jáshikteri de ornatyldy.

«Qalamyz oblys mártebesine ıe bolǵaly kóz aldymyzda ózgerip, jasaryp keledi. Bul bizdi qýantady. Osy isterdiń basy-qasynda júrgen azamattardyń barlyǵyna alǵasytan basqa aıtarymyz joq. Densaýlyqty saqtaýdyń qanshalyqty mańyzdy ekenin ásirese biz, dárigerler jaqsy bilemiz. Al myna skver – basty baılyǵymyzdy qalypty ustap turýǵa taptyrmas oryn. Taǵy bir atap óterligi – bul skverdiń salynýy bizge degen qurmettiń belgisi dep bilemin, - dedi ardager dáriger, medısına ǵylymdarynyń doktory, professor Raıfa Ivanova.
Bıyl oblys ákiminiń qoldaýymen Semeı qalasyn abattandyrý jumystary aıasynda 62 aýla men 4 qoǵamdyq keńistik jańǵyrtyldy. Onyń ishinde dál osy dárigerler skveri, qutqarýshylar skveri, Máńgilik el kóshesi, tarıhı qıylys syndy birneshe oryn bar. Al sol jaǵalaýdaǵy Muhtar Áýezov alańynda jóndeý jumystary belsendi júrgizilýde.