31 Qazan, 2024 NEWS
Jeltoqsan aıynan bastap kólikterdiń ortasha jyldamdyǵy esepke alynady- IIM
QR Ishki ister mınıstrligi avtokólikterdiń «ortasha jyldamdyǵy» halyqaralyq, respýblıkalyq mańyzy bar joldardyń qaladan tys jáne túzý joldarynda ǵana avtomatty túrde esepteletinin málim etti.
Kórneki sýret
«Qazaqstan Prezıdenti bıylǵy 3 qazanda «Qazaqstan Respýblıkasynyń keıbir zańnamalyq aktilerine kólik quraldarynyń jekelegen túrleriniń qozǵalysyn uıymdastyrý jáne jol qaýipsizdigin sıfrlandyrý máseleleri boıynsha ózgerister men tolyqtyrýlar engizý týraly» Zańǵa jáne ilespe qujatqa qol qoıdy. Bul jańa ózgerister eki kezeńde engiziledi. Osy jyldyń 4 jeltoqsanynan bastap ózgeristerdiń negizgi bóligi engizilse, 2025 jyldyń 4 sáýirinen bastap mopedterge qatysty tolyqtyrýlar qoldanysqa enedi», - delingen IIM baspasóz qyzmetiniń Kazinform agenttigine bergen jaýabynda.
Atap aıtqanda, bul zańnamaǵa «Kólik quraly qozǵalysynyń ortasha jyldamdyǵy» uǵymy engizildi jáne ony esepteý tártibi qarastyryldy. Bul tártip halyqaralyq, respýblıkalyq mańyzy bar jalpyǵa ortaq paıdalanylatyn joldar ýchaskesiniń uzyndyǵyn kólik quraly qansha ýaqytta júrip ótse, sol ýaqyt aralyǵyna bólip esepteý arqyly aıqyndalady.
«Avtomatty rejımde jumys isteıtin sertıfıkattalǵan arnaıy baqylaý-ólsheý tehnıkalyq quraldarymen jáne jabdyqtarmen kólik quralynyń ortasha qozǵalys jyldamdyǵyn aıqyndaý nátıjeleri boıynsha eń joǵary qozǵalys jyldamdyǵynan asyp ketý faktisi anyqtalady. Osylaısha, kóliktiń ortasha jyldamdyǵy bekitilip, ony esepteý tásili aıqyndalǵannan keıin, sol arqyly júrgizýshilerdiń belgilengen qozǵalys jyldamdyǵyn saqtaýyn baqylaý júzege asyrylady. «Ortasha jyldamdyq» arnaıy jabdyqtar jáne quraldar arqyly tek qana halyqaralyq, respýblıkalyq mańyzy bar joldardyń qaladan tys jáne túzý joldarynda ǵana avtomatty túrde esepteledi», - delingen vedomstvo aqparatynda.
Qate tapsańyz, qajetti bólikti tańdap ctrl+enter basyńyz.
Usynylǵandar
Pikir qaldyrý
pikir