Aqtaýda «PATRIOT BOL» gala-konserti ótti

Aqtaý qalasynda amfıteatr sahnasynda «JasArt» jekemenshik mekemesiniń uıymdastyrýymen «PATRIOT BOL» gala-konserti ótti. Basty maqsaty – ár adamnyń boıyna patrıotızmdi qalyptastyrý.
 
Merekelik konsertti úsh myńǵa jýyq qala turǵyny tamashalady. Is-shara barysynda kórermenge vıktorınalyq suraqtar qoıylyp, syılyqtar berildi.

Sharanyń shymyldyǵyn Mańǵystaý óner kolledjiniń stýdentteri, «JasART» jastar teatry jáne «TeART» stýdııasy memlekettik ánuranmen ashty. Odan keıin óńirdiń ónerpazdary Esqalı Baýyrjan, Asyltas Aıap jáne Suńǵat Joldasbaı óner kórsetip, kórermendi merekemen quttyqtady.

Keshtiń basty qonaǵy – «Qazaqsha Therapy» ujymy. Almatydan kelgen ónerpazdar konserttik baǵdarlamasyn «Adaı» kúıimen jáne arnaıy bıshiniń qoıylymymen bastady. Ári qaraı Jaıaý Musanyń «Aq sısa», Sáken Seıfýllınniń «Taý ishinde» jáne «Dúr qamshy» ánderin oryndady.

 
«Mańǵystaý oblysy ishki saıasat basqarmasynyń tapsyrysymen «Jasart» jekemenshik mekemesi patrıottyq is-shara ótkizý boıynsha grant ıegeri atanǵan bolatyn. Otansúıgishtik pen ulttyq rýhty dáripteý, jas urpaqtyń patrıottyq sezimin oıatý maqsatynda «Patrıot bol» jobasyn júzege asyryp jatyrmyz. Bul joba aıasynda biz birneshe mindetterdi atqardyq. «Patrıot bol» jobasyn qorytyndylaý maqsatynda Respýblıka kúnine oraı ashyq aspan astynda gala konsert uıymdastyrdyq», – deıdi joba avtory, Nurmuhan Jantórın atyndaǵy mýzykalyq-drama teatrynyń rejısseri Álııa Isaeva.

Sonymen qatar konsertti tamashalaǵan kórermen pikirin suraǵan bolatynbyz. Olar osy sekildi jobalar halyqtyń rýhyn kóterý úshin qajet ekenin aıtty.

«Konsert joǵary deńgeıde uıymdastyrylǵan. «Qazaqsha Therapy-ny» kórgenimiz úshin qýanyshtymyz. Búgin tyńdaǵan ánderden rýh alyp, qanattanyp qaıttyq. Otbasymmen keldim. Balalaryma osyndaı sharany kórsetkenim qýantady», – deıdi Sandýǵash atty kórermen.