Abaı oblysynda órt sóndirýshiler men ormanshylarǵa eskertkish ashyldy

Abaı oblysynda orman órtimen kúreste qaza tapqan órt sóndirýshiler men ormanshylarǵa eskertkish ashyldy. Ashylý saltanatyna oblys ákimi Nurlan Uranhaev, oblystyq máslıhat tóraǵasy Qýanysh Súleımenov, qaza tapqan ormanshylardyń týystary, memlekettik organdardyń qyzmetkerleri jáne jergilikti turǵyndar qatysty. Sharada batyrlardyń qurmetine gúl shoqtaryn qoıý rásimi de ótkizildi.

Eskertkishtiń avtory — músinshi Nurbol Qalıev. Granıt tuǵyrǵa ornatylǵan segiz metrlik eskertkish tilsiz jaýǵa qarsy turǵan «Semeı Ormany» rezervatynyń batyl ormanshylarynyń rýhyna taǵzym ispettes. Qoladan jasalǵan eskertkish qaza tapqandardyń batyldyǵy men óz isterine degen adaldyǵyn beıneleıtin releftermen bezendirilgen.

Eskertkishtiń ashylýynda sóz alǵan aımaq basshysy Nurlan Uranhaev jerlesterimizdiń erlik dańqy óshpeıtindigin erekshe atap ótti.

«Qara ormandy qadirlep, batyldyq pen batyrlyqtyń jarqyn úlgisin kórsetkender urpaq jadynda máńgi saqtalady. Bul tuǵyrtas tabıǵattyń tosyn minezine tótep bergen azamattardyń atyn áıgileý úshin arnaıy qoıylyp otyr. Esimderi tarıh taqtasyna altyn árippen jazylyp, urpaǵy maqtan eter jerlesterimizge, biz, qashanda basymyzdy ıemiz!», - dedi aımaq basshysy Nurlan Uranhaev óz sózinde.

Sharada qaza tapqan ormanshylardyń týystary sóz sóıledi. Solardyń biri Araı Ámirhanova eskertkish batyrlarǵa qurmet ekenin atap ótti.

«Ashylǵan eskertkish beıbit kúnniń batyrlaryna kórsetilgen qurmet dep esepteımin. Memleket tarapynan kórsetilgen qoldaýdy sol qaıǵyly kúnnen beri sezinip kelemiz. Biri jarynan, biri ulynan, biri aǵa-baýyrynan aıyrylǵan qaıǵyly jaǵdaıdy el bolyp birge ótkerdik. Búgin mine eńseli eskertkish ornatyldy. Alǵash ret bizben kezdeskende Memleket basshysy Qasym-Jomart Kemeluly barlyq kómekti alasyzdar dep aıtqan bolatyn. Prezıdentimizge qoldaý kórsetip, kómek qolyn sozǵany úshin zor alǵys bildiremin. Barlyq kómekti aldyq, oǵan myń da bir alǵys» - dedi Araı Ámirhanova.

Eskertkish Borodýlıha aýdanyndaǵy Kamyshenka ormanshylyǵynyń mańy men respýblıkalyq kúre joldyń boıynda ornalasqan. Bul batyldyq pen adaldyqtyń máńgilik sımvolyna aınalyp, óz halqynyń qaýipsizdigi men tabıǵatty qorǵaý úshin ózin qurban etkenderdi eske salady.