Almatyda elektr energııa tarıfi ózgeredi

Almatyda barlyq tutynýshyǵa tarıfter 15 qazannan bastap ózgeredi.

"Ortasha tarıf 29,04 teńge bolady, ıaǵnı 3,7 paıyzǵa ósip otyr. Halyqqa 27,59 teńgege ózgeredi, ıaǵnı 8 paıyzǵa ósedi. Zańdy tulǵalarǵa 30,08 teńge bolady, 8 paıyzǵa ósedi. Bıýdjettik uıymdardyń tarıfi 30,47 teńge bolady, ol 7 paıyzǵa tómendeıdi", – dedi departament ókili.

"Buǵan elektr energııasyn óndirýshi qyzmetine tarıfterdiń ósýi, elektr energııasyn berý qyzmetine tarıfterdiń ózgerýi áser etip otyr", – dedi Ásel Bódeneeva.

Aıta keteıik, 2024 jyly aqpanda kommýnaldyq qyzmet baǵasy boıynsha aıtarlyqtaı ósim tirkelgeni belgili boldy.

Aqpannyń qorytyndysy boıynsha sýǵa baǵa jyldyq mánde 33,9 paıyzǵa ósti, bul basqa kommýnaldyq qyzmetterge qaraǵanda kóp.

Sol kezde qalǵan kommýnaldyq qyzmetter boıynsha da osyndaı jaǵdaı baıqaldy:

• jylytý boıynsha baǵa ósimi bir jylda 30,9 paıyz bolǵan;
• sýyq sýǵa 30,8 paıyz;
• qoqys tógýge 30,7 paıyz;
• ystyq sýǵa 29,4 paıyz;
• elektr energııasyna 19,9 paıyz.