"Bul yńǵaısyz suraq": Energetıka mınıstrine AES salynatyn aýylǵa otbasyńyzben kóship barýǵa daıynsyz ba degen saýal qoıyldy

Sondaı-aq mınıstrge osy arqyly bul jobanyń qaýipsiz ekenin kórsetýge ázirsiz be degen suraq joldandy. 

Mınıstrdiń aıtýynsha, AES salý onyń qurylysyn baqylaýǵa baılanysty uzaq merzimdi tekserýlermen qatar júredi.

"Qazirgi zamanǵy atom elektr stansııalary – barlyq qajet fızıkalyq, energetıkalyq, radıologııalyq quraldarmen jabdyqtalǵan. Sondaı-aq shyǵaryndylary az, úsh eselik baqylaý deńgeıi bar, belgili bir operasııalardy júrgizý tártibimen jabdyqtalǵan ekologııalyq taza nysan. Árıne, tıisti sheshimder shyǵarylsa ol jerge turaqty túrde baryp turýdy josparlap otyrmyn. Biz referendýmnyń túpkilikti nátıjelerin kútemiz jáne kásibı mindetterimizdi oryndaýǵa, usynylǵan sheshimge jaýapkershilikke negizdelgen elektr energııasynyń tapshylyǵyn jabýǵa tyrysamyz”, – dep jaýap berdi sheneýnik.

Aıta keteıik, Satqalıev ózine qoıylǵan suraqty yńǵaısyz dep tanydy.

"Jýrnalıster suraqty jaýabyn estý maqsatymen emes, jaı sabotaj jasaý úshin, áser qaldyrý nemese nazar aýdartý úshin qoıady. Menińshe, bul da yńǵaısyz suraq”, – dedi mınıstr. 

Aıta keteıik, memleket basshysy 2 qyrkúıekte Qazaqstan halqyna jasaǵan joldaýynda AES salý boıynsha referendým 6 qazanda ótetinin habarlaǵan edi. 

6 qazanda elimizde AES salý boıynsha referendým ótti. Alǵashqylardyń biri bolyp premer-mınıstr daýy berdi. Keıinnen memleket basshysy Qasym-Jomart Toqaev daýys berdi. Sosyn elimizdiń alǵashqy prezıdenti Nursultan Nazarbaev kelip daýys berip, qazaq halqyna baqyt tiledi.

Ortalyq referendým komıssııasy árbir eki saǵat saıyn daýys berýshilerdiń qatysýy týraly oblystardyń, respýblıkalyq mańyzy bar qalalardyń, elordanyń aýmaqtyq komıssııalarynyń deregin berip otyrdy.

Respýblıka boıynsha ýchaskelerde daýys berý saǵat 20:00-de aıaqtaldy.

Oblystardyń, respýblıkalyq mańyzy bar qalalardyń, elordanyń komıssııalary usynǵan derekterge sáıkes, tizimge engizilgen azamattardyń 63,87%-y bıýlleten aldy. Iаǵnı daýys berýi kerek bolǵan 12 244 683 adamnyń 7 820 918-i daýys berdi.