08 Qazan, 2024 NEWS
Úkimette qant zaýytynyń jobasy tanystyryldy
Úkimet otyrysynda vıse-premer Serik Jumanǵarınniń tóraǵalyǵymen qant zaýytyn salý boıynsha ınvestısııalyq usynys tanystyryldy.
Kórneki sýret
Úkimettiń baspasóz qyzmeti taratqan aqparatqa sáıkes, jobany «K-Agro Holdıng» jáne «Báıterek» holdıngi júzege asyrýdy josparlap otyr. Bolashaq zaýyttyń orny Jambyl oblysynda dep belgilendi.
Jobaǵa sáıkes, zaýyttyń óńdeý qýaty táýligine 8-10 myń tonnany quraıdy, bul jylyna 1 mln tonna qant qyzylshasyn óńdeýge jáne 130 myń tonnaǵa jýyq qant óndirýge múmkindik beredi.
Sonymen qatar óńdeý qýatyn arttyrý úshin jumys istep turǵan qant zaýyttaryna jańǵyrtý júrgizilýde. Bul jumys jańa zaýyttyń qurylysymen birge Qazaqstanǵa qant boıynsha ımportqa táýeldilikti kezeń-kezeńimen tómendetýge jáne qant qyzylshasynan tereńdete qaıta óńdelgen ónimderdi shyǵarýǵa múmkindik beredi.
Qazirgi ýaqytta Qazaqstanda qant qyzylshasyn óńdeý boıynsha jalpy táýliktik qýaty 8,7 myń tonna jáne 2,4 myń tonna qamys quraǵyn óńdeıtin 4 qant zaýyty jumys isteıdi.
2023 jyly respýblıkada qantty ishki tutyný kólemi 507 myń tonnany qurady. El qajettiliginiń negizgi kólemi EAEO elderinen daıyn qantty ımporttaý jáne qamys quraǵyn óńdeý esebinen qamtamasyz etiledi.
Qate tapsańyz, qajetti bólikti tańdap ctrl+enter basyńyz.
Usynylǵandar
Pikir qaldyrý
pikir