Qyrǵyzstan memlekettik aýrýhana basshylaryna jekemenshik emhanalarda jumys isteýge tyıym salmaq

Qyrǵyz Respýblıkasy Jogorký Keneshiniń Áleýmettik saıasat jónindegi komıteti «Azamattardyń densaýlyǵyn qorǵaý týraly» zańǵa túzetýlerdi birinshi oqylymda maquldady.

Depýtat Aısulý Mamashovanyń aıtýynsha, zań jobasy Qyrǵyzstan azamattaryna senimdi jáne sapaly medısınalyq kómek kórsetý úshin ázirlengen.

«Memlekettik medısınalyq mekeme basshylaryn jekemenshik emhanalarda bir mezgilde jumysqa ornalastyrýǵa tyıym salý usynylyp otyr. Memlekettik medısınalyq mekemelerde basshylyq qyzmetterdi atqarýdy jáne jekemenshik emhanalarda jumys isteýdi shekteý sybaılas jemqorlyq shemalarynyń yqtımaldyǵyn azaıtýǵa, medısınalyq qyzmet kórsetý sapasyn jaqsartýǵa jáne halyqtyń densaýlyq saqtaý júıesine senimin arttyrýǵa baǵyttalǵan», - dep atap ótti halyq depýtaty.

Qujatty talqylaý barysynda tek basshylarǵa ǵana emes, medısınalyq mekemelerdiń bólim basshylaryna da jekemenshik emhanalarda jumys isteýge tyıym salý týraly usynys aıtyldy. Sondaı-aq, memlekettik medısınalyq mekeme basshylarynyń jalaqysyn kóterý jáne olardyń qyzmette bolý merzimin 10 jyldan 5 jylǵa deıin qysqartý máselesi kóterildi.

Buǵan deıin Qyrǵyzstan parlamenti endi zań qabyldaýǵa asyqpaıtyny týraly habarlanǵan bolatyn.