06 Qarasha, 2024 NEWS
Qazaqstanda múmkindigi shekteýli balalardyń sany artqan
Sońǵy úsh jylda balalardyń múgedektigi 11 paıyzǵa ósken.
Kórneki sýret
Eńbek jáne halyqty áleýmettik qorǵaý mınıstri Svetlana Jaqypova 2024 jylǵy 6 qarashada QR Úkimetiniń otyrysynda sońǵy úsh jylda Qazaqstanda múgedek balalardyń sany artqanyn aıtty.
Odan bólek, mınıstr búginde elimizde múmkindigi shekteýli 732 myń adam turatynyn, bul halyqtyń jalpy sanynyń 3,6%-yn quraıtynyn atap ótti.
"Onyń 57 paıyzy eńbekke qabiletti jastaǵy adamdar, 27 paıyzy zeınetkerlik jastaǵy adamdar, 15 paıyzy — balalar. 18 jastan asqan jastar arasynda aýrýdyń nozologııalyq formalarynyń qurylymynda psıhıkalyq buzylýlar, qan aınalymy júıesiniń aýrýlary, barlyq lokalızasııanyń jaraqattary basym. Al balalar múgedektigi boıynsha júıke júıesiniń aýrýlary, týa bitken aqaýlar, psıhıkalyq buzylýlar basym", — dedi Svetlana Jaqypova.
Onyń aıtýynsha, júrgizilgen taldaý sońǵy úsh jylda balalardyń múgedektigi 11 paıyzǵa óskenin kórsetedi. Múmkindigi shekteýli balalardyń kópshiligi 7 jastan 18 jas aralyǵynda.
"Múgedektigi bar adamdardy áleýmettik qamsyzdandyrýǵa arnalǵan shyǵystar bazalyq jáne mindetti deńgeıde júzege asyrylady. Jyl saıyn respýblıkalyq bıýdjet pen memlekettik áleýmettik saqtandyrý qorynyń jıyntyq shyǵystary shamamen 22 paıyzǵa ulǵaıady. Bıyl olar 748,5 mlrd teńgeni qurady", – dedi mınıstr.
Qate tapsańyz, qajetti bólikti tańdap ctrl+enter basyńyz.
Usynylǵandar
Pikir qaldyrý
pikir