18 Qarasha, 2024 NEWS
Endi oqýshylar "Bolashaqpen" shetelde oqı alady
Májilis depýtattary jumys tobynyń otyrysynda halyqaralyq olımpıadalar men ǵylymı jobalar jeńimpazdaryn qoldaý týraly normany qabyldady.
Kórneki sýret
Depýtat Ashat Aımaǵambetov óziniń áleýmettik jelisinde óte mańyzdy túzetý jaıly jazdy. Depýtat ataǵandaı, endi halyqaralyq olımpıadalar men ǵylymı jobalar baıqaýlarynyń jeńimpazdary "Bolashaq" baǵdarlamasy aıasyndaǵy tıisti talaptarǵa sáıkes kelse, bakalavrıat deńgeıinde bilim ala alady.
Buǵan deıin «Bolashaq» tek magıstratýra jáne doktorantýra deńgeıindegi oqýdy qarjylandyratyn. Bul óz aldyna durys sheshim bolǵanymen, halyqaralyq olımpıadalar jeńimpazdaryna qatysty másele týyndaıtyn edi. Álemdik jetekshi ýnıversıtetter bul talantty balalarǵa birden bakalavrıatqa granttar usynatyn, sol sebepti olar shetelge ketip qalatyn. Sol kezeńde biz olarǵa dál osyndaı qoldaý kórsete almadyq, sondyqtan olardy jıi joǵaltyp otyrdyq. Kópshiligi shetelde oqýmen qatar, sol jaqta turaqtap qalyp jatty, - dedi ol.
Osyndaı balalarǵa memlekettik bıýdjet esebinen grant berý – mańyzdy qadam. Sáıkesinshe endi «Bolashaq» baǵdarlamasy eń daryndy oqýshylar úshin bakalavrıattan bastap qoljetimdi bolady.
Bul – jas talanttardy qoldap, olardy elde ustaýǵa múmkindik beretin mańyzdy jańashyldyq. Olar álemniń úzdik joǵary oqý oryndarynda bilim alyp, keıin elge oralyp, Qazaqstannyń damýyna óz úlesterin qosady. Daryndy balalardy qoldaý – olardyń bolashaǵyna salynǵan ınvestısııa ǵana emes, bul Qazaqstannyń damýyna baǵyttalǵan strategııalyq qadam, - dep aıtty Ashat Aımaǵambetov.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir