08 Qarasha, 2024 NEWS
11 balanyń anasy TikTok-taǵy vıdeosy úshin sottaldy
Mańǵystaý oblysynda bılikti synaǵan 11 balanyń anasy sottaldy.
Kórneki sýret
Jańaózendik Jadyra Dosekeeva qylmystyq kodekstiń "telekommýnıkasııa jelilerin paıdalana otyryp, áleýmettik alaýyzdyqty qozdyrý" baby boıynsha kináli dep tanylyp, úsh jyl shartty jazaǵa kesildi. Sondaı-aq belsendi qoǵamdyq jumystarǵa tartylatyn bolady.
Turǵynǵa úsh jyl boıy áleýmettik jelilerdi paıdalanýǵa tyıym salyndy. Sot jańaózendik turǵynnyń bıyl sáýirde TikTok áleýmettik jelisinde jarııalaǵan beınejazbasyn" áleýmettik jáne ulttyq alaýyzdyqty qozdyrýdy negizdeıdi" dep baǵalaǵan.
Belsendige qatysty qylmystyq is bıyl maýsymda qozǵalǵan bolatyn. Sot barysynda prokýror onyń bas bostandyǵyn 4 jylǵa shekteý jazasyn taǵaıyndaýdy suraǵan. Al sot aıyptalýshynyń kámeletke tolmaǵan balalary baryn eskerip, úsh jyl shartty jaza kesken. Sondaı-aq belsendi jazany óteý kezinde jyl saıyn 100 saǵatqa májbúrli eńbekke tartylady.
Bul máselege qatysty Mańǵystaý oblysy polısııa departamentiniń ókilderi pikir bildirdi.
- Sottalýshy Jadyra Dosekeeva óziniń kinásin moıyndamaı, sottan aqtaý úkimin shyǵarýdy surady. Jadyra Dosekeevanyń kinási kýálerdiń jaýaptarymen, psıhologııalyq-fılologııalyq saraptama qorytyndysymen, istiń basqa da qujattarymen dáleldendi. Sot Jadyra Dosekeevaǵa jaza taǵaıyndaý barysynda asyraýynda kishkentaı balalarynyń bolýyn qylmystyq jaýapkershiligin jeńildetetin mán-jaılar dep tanydy. Aýyrlatatyn mán-jaılar anyqtalmady, - delingen habarlamada.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir