Endi qazaqstandyqtar kommýnaldyq qyzmetterdi kim jáne qansha tutynatynyna baılanysty tóleıdi

Toqaev bıyl halyqqa joldaýynda jyl sońyna deıin energetıka jáne kommýnaldyq sektorlardy jańǵyrtý jóninde ulttyq jobany bekitý qajetin aıtqan edi. 

“Kommýnaldyq resýrstardy únemdeý mádenıetin qalyptastyrý máselesi ózekti kúıinde qalyp otyr. Kelesi jyldan bastap “kóp tutynsań — kóp tóleısiń“ qaǵıdatyn basshylyqqa alyp, tutynýdyń naqty normalaryn engizý qajet", – dedi prezıdent. 

Qazaqstanda kommýnaldyq qyzmetterdiń tómen tarıfterin eskergende, energııa men sýdy tutynýdyń deńgeıi ártúrli. Artyq kólemde tutyný — bul resýrstardy ysyrap etý. Endeshe áleýmettik normalarǵa tolyǵyraq toqtalaıyq. Sýmen jabdyqtaý salasynda tutyný lımıtine baılanysty tórt deńgeıli tarıfti qoldaný kózdelgen. Munda ekonomıkalyq shyǵyndar bylaısha bólingen:

• aıyna 3 tekshe metrge deıin tutynatyn birinshi topqa halyqqa arnalǵan tarıf deńgeıinde;
• aıyna 3-ten 5 tekshe metrge deıin tutynatyn ekinshi topqa halyqqa arnalǵan tarıf deńgeıine 20% qosylady;
• aıyna 5-ten 10 tekshe metrge deıin tutynatyn úshinshi topqa halyqqa arnalǵan tarıf deńgeıine 50% qosylady;
• aıyna 10 tekshe metrden kóp tutynatyn jáne esepteý quraldary joq tórtinshi topqa halyqqa arnalǵan tarıf deńgeıine 100% qosylady.

Jylýmen jabdyqtaý salasynda tarıfterdi saralaý turǵyn úı alańynyń bir abonentke shaqqandaǵy shamasy boıynsha júzege asyrylady:

• turǵyn úı aýdany 100 sharshy metrge deıingi birinshi top — bekitilgen tarıf boıynsha;
• turǵyn úı aýdany 100-den 200 sharshy metrge deıingi ekinshi top — bekitilgen tarıfke 10% qosylady;
• turǵyn úı aýdany 200 sharshy metrden asatyn úshinshi top — ortasha tarıf boıynsha.

Aıta keterligi, tabıǵı monopolııalar sýbektileri qosymsha alǵan tabys Turǵyn úı-kommýnaldyq sharýashylyq salasyndaǵy basym mindetterdi sheshýge kómektesedi. Sondaı-aq rettelip kórsetiletin qyzmet boıynsha jabdyqtar men jelilerdi jańartýǵa, qaıta qurylymdaýǵa, negizgi quraldardy satyp alýǵa baǵyttalady. Bul qarajat usynylatyn kommýnaldyq qyzmetterdiń sapasyn jaqsartýǵa jumsalady.