22 Qazan, 2024 NEWS
Kórneki sýret
Endigi ýaqytta Qazaqstan azamattyǵyn alǵysy kelgen adamdar qazaq tilin, el tarıhy men Konstıtýsııasynyń negizderin tym bolmaǵanda qarapaıym deńgeıde bilýge mindetti. Talap taıaýda ǵana «Kóshi-qon máseleleri týraly» zańǵa engizilgen bolatyn.
Bıylǵy jyldyń basynan bastap Qazaqstanǵa 45,8 paıyzy Qytaıdan, 39 paıyzy — О́zbekstannan, 5,9 paıyzy — Mońǵolııadan, 5,2 paıyzy Túrikmenstannan, 2,9 paıyzy Reseıden jáne 1,2 paıyzy basqa elderden qandastar kelgen.
«1 qazandaǵy jaǵdaı boıynsha eńbekke qabiletti jastaǵy etnıkalyq qonys aýdarýshylar sany 57,6 paıyzdy, eńbekke qabiletti jastan kishi 33,1 paıyzdy jáne zeınetkerler 9,3 paıyzdy quraıdy.
Eńbekke qabiletti jastaǵy qandastardyń ishinen bilim deńgeıi boıynsha 17,9 paıyzy joǵary bilimdi, 24,4 paıyzy orta kásibı bilimdi, 54,4 paıyzy jalpy orta bilimdi, jáne 3,3 paıyzynyń bilimi joq. Al qonys aýdarǵan etnıkalyq qazaqtar respýblıkanyń túrli óńirlerine qonystandy», — dep málimdedi Eńbek jáne halyqty áleýmettik qorǵaý mınıstrliginen.
Sonymen birge, qandastardy qonystandyrý úshin kelesideı eńbek kúshi tapshy óńirler anyqtaldy: Aqmola, Abaı, Qostanaı, Pavlodar, Shyǵys jáne Soltústik Qazaqstan oblystary.
«Qonystandyrý óńirlerinde 2024 jylǵa arnalǵan qandastardy qabyldaý kvotasy 3 033 adamdy quraıdy. 2024 jylǵy 1 qazandaǵy jaǵdaı boıynsha qonystandyrý óńirlerine 2 477 qandas qonys aýdardy.
Joǵaryda atalǵan óńirlerde qonystanǵan qandastarǵa kóshýge sýbsıdııa túrinde memlekettik qoldaý sharalary usynylady — bir mezgilde otaǵasyna jáne otbasynyń árbir múshesine 70 AEK (258,4 myń teńge) mólsherinde; turǵyn úı jaldaýǵa jáne kommýnaldyq qyzmetterge aqy tóleýge — bir jyl ishinde 15-ten 30 AEK (55,3-den 110,7 myń teńgege deıin) mólsherinde.
Jyl basynan beri 2140 qandasqa túrli qoldaý sharalary kórsetildi. Atap aıtqanda, 575 adam turaqty jumysqa ornalastyryldy», — dep jazylǵan aqparatta.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir