Almaty qalasynyń basqarmasy Qytaıdyń iri týrıstik kompanııasymen memorandýmǵa qol qoıdy

Almaty qalasynyń Týrızm basqarmasy men Qytaıdyń týrıstik naryǵyndaǵy jetekshi kompanııa – Leader International Tourism Group Limited yntymaqtastyq jáne birlesken jobalardy júzege asyrý týraly memorandýmǵa qol qoıdy, dep jazady Qamshy.kz aqparat agenttigi. 

Kelisimniń negizgi maqsaty – Almatynyń týrıstik áleýetin halyqaralyq deńgeıde ilgeriletý, týrısterdi tartý úshin ınnovasııalyq sheshimderdi engizý, týrıstik ınfraqurylymdy keńeıtý jáne týrızmniń turaqty damýyn qamtamasyz etý.

Leader International Tourism Group Limited kompanııasy 2007 jyly negizi qalanǵan jáne búgingi kúni Taıaý Shyǵys, Afrıka, Ońtústik Eýropa, Avstralııa, Jańa Zelandııa, Ortalyq jáne Ońtústik Azııa, sondaı-aq Ońtústik Amerıka sııaqty kóptegen aımaqtardy qamtıdy.

Týrızm basqarmasynyń málimdeýinshe, Almaty Ortalyq Azııadaǵy aımaqtyq týrıstik destınasııa bolyp tabylady. 2023 jyly týrısterdiń jalpy sany 2 mıllıonnan asyp, 12,6%-ǵa ósti. Sheteldik týrısterdiń sany úshten birge artyp, 540,7 myń adamǵa jetti. Sonymen qatar, QHR-dan kelgen týrıster jalpy kelýshilerdiń 12,2%-yn qurap, úshinshi orynǵa ıe boldy.

QHR-dyń iri týrıstik kompanııalarynyń birimen memorandýmǵa qol qoıý Almatyǵa birqatar mańyzdy artyqshylyqtar ákeledi. Eń aldymen, bul Qytaıdan keletin týrıstik aǵyndy 2 eseden astam arttyrýǵa yqpal etedi. Leader International Tourism Group Limited kompanııasy týrıstik baǵyttardy ilgeriletýde keń halyqaralyq tájirıbege jáne ınnovasııalyq tásilderge ıe. Bul týrısterdi tartýǵa arnalǵan jańa tıimdi strategııalardy engizýge múmkindik bermek.

Sonymen qatar, memorandým birlesken marketıngtik kampanııalardy júzege asyrý, týrıstik ınfraqurylymdy damytý jáne týrıstik qyzmetterdiń sapasyn jaqsartý úshin negiz bolady. Bul Almatynyń halyqaralyq týrıstik qyzmetter naryǵyndaǵy pozısııasyn nyǵaıtyp, qalany sheteldik týrıster úshin tartymdyraq etedi.