"Zııandy qaldyqtar bólinbeıdi": 1,5 jyl zertteý jasaǵan Azamattyq alıans prezıdenti AES týraly ne dedi?

Qazaqstannyń Azamattyq alıansy 1,5 jyldaı AES salý máselesi týraly izdene kele eń damyǵan memleketterde atom energetıkasy ekonomıkaǵa jumys isteıtinine kóz jetkizgen. Bul týraly alıans prezıdenti Baný Nurǵazıeva baıandap, Qazaqstan AES salar bolsa eń qaýipsizin tańdaıtynyn aıtty.

"Atom energııasy – búgingi kezeńde eń taza qýat kózi. Bul jasyl ekonomıkany damytýǵa septik etedi. AES arqyly aýaǵa zııandy qaldyqtar bólinbeıdi. Táýelsiz el bolǵanmen energııa jaǵynan táýeldi bolýymyz durys emes. Oǵan qajetti otyndy ózimiz shyǵaryp otyrmyz. Shyǵys Qazaqstanda Úlbi zaýytynda ýran tabletkalary Qytaıǵa, shetelderge satylady. Sol múmkindikti paıdalanýymyz kerek", deıdi Baný Nurǵazıeva.

Sonymen qatar, ol álemdik tájirıbedegi 3 iri AES apaty halyqtyń qorqynyshyn týdyrǵanyn rastap otyr.

"О́zim basqaratyn salada, ıaǵnı ÚEU-lar tarapynan da suraqtar kóp qoıyldy. Álemdik tájirıbedegi 3 iri AES apaty bizdiń halqymyzdyń qorqynyshyn qalyptastyrǵan. Sol qorqynyshty seıiltý úshin aıtarym – Semeıdegi polıgon shyn mánindegi synaq alańy bolǵan. Basqa apattardyń da qazirgi bizdiń jaǵdaıǵa qatysy joq. Búginde bizdiń aıtyp júrgenimiz bomba nemese polıgon synaǵy emes, beıbit atom stansasy týraly. Qazaqstanda qazirgi tańda elektr energııasynyń 70 paıyzy kómirmen jumys isteıtin JEO-lar óndiredi", deıdi ol. 

Baný Nurǵazıeva álemdik tájirıbedegi birneshe mysalmen bólisti. 

"Álemdik deńgeıdi alsaq, AQSh atom stansasy boıynsha birinshi oryn alady. Alyp elde 94 atom reaktory jumys istep tur. Qazaqstan aýmaǵyna bes Fransııa sııady dep maqtanamyz. Sol bir Fransııada 56 AES bar. Osy elderdi úlge ete otyryp, úmitkerler qataryndaǵy memleketterdiń ishinen Qazaqstan eń qaýipsiz atom stansasyn tańdaıdy. Sebebi bizge ekonomıkamyz turaqty damýy úshin ekologııalyq taza ári qaýipsiz, úzdiksiz kúshti qýatpen energııa beretin kóz kerek", deıdi Baný Nurǵazıeva.