Almaty ákimi Erbolat Dosaev Dúnıejúzilik qolóner keńesiniń prezıdenti Saad Hanı Al-Kaddýmı myrzamen kezdesti

Almaty ákimi Erbolat Dosaev pen Dúnıejúzilik qolóner keńesiniń (AISBL) prezıdenti Saad Hanı Al-Kaddýmı qolónerdi damytýdyń bolashaǵy men elder arasyndaǵy yntymaqtastyqty nyǵaıtý máselesin talqylady. Qala basshysy Almatynyń Qazaqstannyń mádenı, ǵylymı-bilim berý jáne iskerlik ortalyǵy, sheberler men sýretshiler úshin tartymdy ortalyq ekenin atap ótti.

Qalada zergerlik buıymdar jasaý, kilem toqý, qysh jasaý, bylǵary óńdeý jáne aǵash oıýmen aınalysatyn 250-den astam on saýsaǵynan óner tamǵan qolónershi turady. Almatylyq sheberlerdiń buıymdary EKSPO jáne Dúnıejúzilik qolóner keńesi sııaqty aıtýly is-sharalarda kórsetilip, biregeıligi men sheberligi úshin marapattarǵa ıe bolyp júr. Festıvalder men jármeńkelerde sheberler týyndylaryn kórsetip, qyzyǵýshylyq tanytqandarǵa sheberlik dáristerin ótkizedi. Bul is-sharalar dástúrli qazaq qolónerin saqtaý, ony nasıhattaý jáne zamanaýı mádenıetke birigýde mańyzdy ról atqarady.

Kezdesý barysynda taraptar qolónerdi damytýdyń týrıstik jáne ekonomıkalyq qyrlaryn, jumys oryndaryn qurý jáne ekonomıkalyq ósimdi yntalandyrý úshin ony damytýdyń qajettiligin talqylap, Almatyǵa «Dúnıejúzilik qolóner qalasy» (World Craft City) ataǵyn berý múmkindigin qarastyrdy.

Anyqtama úshin: Dúnıejúzilik qolóner keńesi AISBL (1964 jyly 12 maýsymda Nıý-Iorkte qurylǵan) – jahandyq qolóner ónerin jáne dástúrli qolónerdi saqtaýǵa, nasıhattaýǵa jáne damytýǵa yqpal etetin halyqaralyq kommersııalyq emes uıym. Keńes IýNESKO janyndaǵy keńesshi organ mártebesine ıe. Uıymnyń 2021-2024 jyldardaǵy shtab-páteri Kýveıtte ornalasqan. Dúnıejúzilik qolóner qalalarynyń tizimine Afrıka, Azııa-Tynyq muhıty aımaǵy, Eýropa, Soltústik jáne Latyn Amerıkasynyń 57 qalasy engen, sonyń ishinde 2022 jyldan bastap Qazaqstandaǵy qalalardyń arasynan alǵash ret Taraz «Dúnıejúzilik qolóner qalasy» mártebesin aldy.