Reseı Baıqońyrdan zymyran ushyrý merzimin uzartqysy keledi

"Roskosmos" jáne "Proton" zymyran óndirýshisi – Hrýnıchev atyndaǵy ortalyq zymyran tasymaldaǵyshtaryn Baıqońyrdan 2025 jyldan keıin de ushyrýdy jalǵastyrýdy usyndy.

"Hrýnıchev atyndaǵy ortalyq pen "Roskosmos" memlekettik korporasııasy tarapynan usynystar pysyqtalyp, qazaqstandyq áriptesterimizge joldandy. Qazir bul máseleni, onyń ishinde "Baıqońyr" kesheni boıynsha úkimetaralyq komıssııa sheńberinde iske asyrý joldaryn izdeý prosesi júrip jatyr", – dedi Varochko.

Varochkonyń aıtýynsha, on "Proton-M" zymyran tasymaldaǵyshy túrli daıyndyq deńgeıinde. Olardyń keıbireýleri reseılik ǵarysh baǵdarlamasyn júzege asyrý úshin, al keıbireýleri kommersııalyq ushyrý úshin paıdalanylady. Geosaıası jaǵdaıǵa baılanysty zymyrandardyń bir bóligi eshqashan paıdalanylmady.

"Osyǵan baılanysty Hrýnıchev ortalyǵy Roskosmospen birlesip, ishki jáne syrtqy naryqta tegin zymyran tasymaldaǵyshtardyń paıdaly júkteme nusqalaryn zerttep jatyr", – dep qosty Varochko.

2015 jyly Qazaqstan men Reseı "Proton" zymyrandaryn ushyrýdy 2025 jyldan keıin toqtatamyz  dep kelisti. Reseı tarapy "Proton" óndirýdi toqtatyp, ony tolyǵymen ekologııalyq taza Angara zymyranymen almastyratynyn aıtty. О́ıtkeni ýly geptıldi otyn úshin "Protonǵa" shaǵymdanýshylar kóp.

Buqaralyq aqparat quraldarynyń habarlaýynsha, "Proton" Reseıdegi eń qýatty zymyran. Ol memlekettik jáne kommersııalyq baǵdarlamalar boıynsha ártúrli ǵarysh apparattaryn ushyrýǵa arnalǵan. Onyń alǵashqy ushyrylymy 1965 jyly 16 shildede ótti. Osy serııada barlyǵy 400-den astam zymyran ushyryldy.

Aıta keteıik, Reseı 1994 jyldan beri Qyzylorda oblysynda ornalasqan "Baıqońyr" ǵarysh aılaǵyn jalǵa alǵan. Jaldaý merzimi 2050 jylǵa deıin. Reseı Baıqońyrdy jalǵa alǵany úshin jyl saıyn 115 mıllıon dollar tóleıdi.