16 Mamyr, 2024 NEWS
Baıqońyrdan Reseıge kóshetinderdiń tizimi jasaqtaldy
Reseı azamattary "Baıqońyr" ǵarysh kesheni men qala aýmaǵynan údere kóship jatyr, - dep habarlaıdy Qamshy.kz aqparat agenttigi inbusiness.kz-ke siltep.
![](/media/2024/05/16/crop-5_0_181x242_104358761800.jpg?width=600&height=480)
Foto: ashyq derekkózden
Baıqońyr qalasynyń Reseı taǵaıyndaǵan ákimshiligi "Reseıge qonys aýdarýshy retinde qala ákimshiliginde esepte turǵan RF azamattarynyń jáne olardyń otbasy músheleriniń" 2024 jylǵy biryńǵaı tizimin túzdi. Sol arqyly qaladaǵy 200-den astam nysandy Qazaqstanǵa bosatyp berdi.
Reseıdiń qurǵan tizimine 315 otbasy kirgen. El bıligi RF Qorǵanys mınıstrligine, TJM-ine, IIM-ine jumys isteıtinder kezekten tys kóshiriletinin málimdedi. Nátıjesinde, 315 otbasydan 789 nómirden turatyn kezek quryldy. Bul otbasylarmen birge Qazaqstannan Reseıge bıyl jalpy sany 650-den asa RF azamaty kóship ketpek.
Sonymen qatar, RF prezıdentiniń 2021 jylǵy 24 qarashadaǵy №673 jarlyǵyna sáıkes, RF azamattarynyń jekelegen sanattaryna óz otanyna oralsa, áleýmettik tólem tólenedi. Ol qarajatqa otanyna oralǵandar Reseı terrıtorııasynda turǵyn úı satyp ala alady.
Bul tólem Reseıge kóshetinderdiń bárine birdeı berilmeıtindigi aıtyldy. Ony alatyndar sanatyna "Baıqońyr" kesheniniń aýmaǵynda, federaldyq memorgandarynda, kásipodaqta, zymyran-ǵarysh ónerkásibinde, RF-tiń eń kemi 50 paıyz úlesi bar uıymdarda kem degende 10 jyl jumys ne qyzmet ótili bar azamattar jatady.
BAQ-taǵy aqparat boıynsha Baıqońyr qalasynyń ákimshiligi 2025 jyly Reseıge qonys aýdaratyndardyń da kezegin qalyptastyrýǵa kirisip ketken. Ol tizim budan da uzyn bolatyn túri bar. Qazirdiń ózinde 2025 jyldyń kezegine 689 reseılik otbasy kirdi.
"Baıqońyr qalasy Reseı federasııasynyń federaldyq mańyzdaǵy qalasyna sáıkes keletin mártebege ıe. Onda azamattardyń turýynyń, obektilerdiń, kásiporyndar men uıymdardyń qaýipsiz qyzmet etýiniń erekshe rejımi engizilgen. Baıqońyr qalasynda 76,5 myńnan astam adam tirkelgen. Bular – RF, Qazaqstan jáne ózge memleketterdiń azamattary", – dep jalpylama jazylǵan qala ákimshiliginiń resmı ınternet resýrsynda.
Sondaı-aq, Reseıge attanýǵa ázirlenip jatqandardyń tiziminde О́rkenbaev, Toqshylyqova, Tájibaev, Daýylbaeva, Estileýov, Shańǵytpaev, Dosymova, Arynova sııaqty qazaqy famılııalar órip júrgeni belgili boldy
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir