Atyraý qalasynda birneshe kún ishinde 100 shaqyrymnan astam qorǵanys bógetteri salyndy

Oblys ortalyǵynda Jaıyq ózenindegi sý deńgeıiniń kóterilýine jáne Irıklın sý qoımasynan sý aǵynynyń ulǵaıýyna baılanysty jaǵalaýdy nyǵaıtý jumystary qarqyndy júrgizilip jatyr. 

Sońǵy alty kúnde (13 sáýir kúni tańerteńgi málimet boıynsha) josparlanǵan 215,1  shaqyrymnyń 101,2 shaqyrymyna jaǵalaýdy nyǵaıtý bógetteri salyndy. Aıta ketý kerek, bastapqyda kartografııalyq derekter boıynsha uzyndyǵy 105 shaqyrym bóget qurylysy josparlanǵan.

Búgingi tańda Atyraý qalasynyń mańynda ornalasqan, Jaıyq ózeni men Kaspıı teńizi arasyndaǵy mańyzdy arterııa - Sokolok kanalyn tereńdetý jáne keńeıtý jumysy qarqyndy júrgizilýde, onyń uzyndyǵy - 24 shaqyrym. Arna keńeıtilip,  qalǵan topyraq bógetterdi nyǵaıtýǵa qoldanylady. Sondaı-aq, qazirgi Sokolok kanalynyń janynan qosymsha kanal salynyp jatyr. Sokolok kanalynan sý tasyp ketken jaǵdaıda ekinshi kanal rezervtik gıdrotehnıkalyq qurylys qyzmetin atqarady. Qazir 12 shaqyrymynyń jumysy aıaqtaldy.

Tek Atyraý qalasy boıynsha jaǵalaýdy nyǵaıtý bógetterin salýǵa 1 myńǵa jýyq arnaıy tehnıka, 3,2 myń túrli mekemelerdiń qyzmetkeri jáne 3,5 myńnan astam erikti jumyldyryldy.

Jergilikti tórt kompanııanyń kúshimen Qaraózek kanalynyń jaǵalaýyn bekitý jumystary júrgizilýde. Onyń uzyndyǵy 35 shaqyrymnan astam - Atyraý-Oral tas jolynan Erkinqala aýyldyq okrýgine deıin. Bul kanal Jaıyqtyń bir salasy bolǵandyqtan ózen úshin erekshe mańyzdy. Munda bógetterdi nyǵaıtý (qosymsha 1,5-2 metrge kóteriledi), arnany, kópir ótkelderi men shlıýzderdi tazartý jumystary júrgizilýde. Sonymen qatar, sońǵy jyldary sharýa qojalyqtarynyń qojaıyndary kanal arqyly qubyrlar men topyraqtan ótkelder júrgizgen, olar qazir sýdyń ótýin jaqsartý maqsatynda ashylyp jatyr.

Qaraózek kanalynyń jaǵalaýyn bekitý jumystaryna tórt kompanııadan 350 adam, 50-80 jergilikti turǵyn men eriktiler, sondaı-aq 70-ten astam arnaıy tehnıka jumyldyrylǵan. Aıta ketetin jaıt, josparlanǵan jumystar aıaqtalǵannan keıin bul kompanııalar mol sýdyń kelýi kezinde baqylaýdy jalǵastyrady. Al qajet bolǵan jaǵdaıda qıyn aımaqtarǵa tartylady.

Jalpy, qala irgeles aýyldyq okrýgterimen birge  107 ýchaskege bólinip, árqaısysyna jaýapty tulǵa bekitilip, atqarylǵan jumystar týraly aqparat kún saıyn jańartylyp otyrady. Sý tasqynyna daıyndyq jumystaryna Ishki ister mınıstrligi men Qorǵanys mınıstrliginiń Ulttyq Ulan bólimsheleri jumyldyryldy, basqa óńirlerden tehnıkalar kelip jatyr, óńirdegi iri munaı kompanııalarynyń kúshteri men quraldary da jumyldyryldy. Sonymen qatar, Memleket basshysynyń tapsyrmalaryn oryndaý aıasynda jergilikti kásipkerlik sýbektileri belsendi atsalysýda.

Atyraý oblysynyń TJ jónindegi jedel shtaby