Qazaqstanda Eltańbany tanymaıtyn 70 paıyz adam qaıdan shyqty?

Olardyń sózine sensek, biz biletin eltańba qundylyqtarymyz jaıly syr shertpeıtin ári bolashaqqa jol siltemeıtin rámiz kórinedi. Onyń ústine 500 adam arasynda saýalnama júrgizdik degen olar "otandastarymyzdyń 70%-y eltańbany tanı almady" degen qorytyndyǵa kelgenderin aıtady.

Biz buǵan aıran-asyrmyz! Ásirese, 70 paıyz degen sıfrǵa. Múmkin bular saýalnamany sheteldikter (kórshi elden jóńkı-josylyp jetkender kóp qoı) arasynda júrgizgen shyǵar deıik desek, baspasóz habarlamasynda otandastarymyz, naqtyraǵynda "qazaqstandyqtar arasynda júrgizilgen" dep taıba tańba basqandaı kórsetilip tur. Sonda Qazaqstanda eltańbany tanymaıtyn munsha adam qaıdan shyqty?..

Kitap betin ashpaǵan (oqýlyqtardyń alǵashqy betinde memlekettik rámizderdiń sýretteri beriledi), mektepke barmaǵan (bilim ordasy tórinde de eltańba, ánuran, tý turady) degenniń ózinde tıyn-tebendi ustap kórgen jandar shyǵar, eń quryǵanda, bir betinde el rámizi tańbalanǵan. Sondyqtan osy arasy endi túk qısynǵa kelmeıdi. Sıfrdy aıtamyz!

Jalpy, bul usynys qoǵamda belgili bir deńgeıde narazylyq týdyrýda. 

Kezinde Mońǵolııa astanasy Ulan-Batordan kóship kelgen, memlekettik deńgeıde laýazymdy qyzmetter atqarǵan Asylbek Baıajuma Qazaqstannyń Eltańbasy álemdegi eń ásem 9 eltańbanyń biri ekenin, ózderin atajurtqa shaqyrǵan osy Kók tý men aıbarly Eltańba ekenin basa aıtady.

"Eltańbany saýalnama júrgizgende 70% tanymady degen ótirik sózdi qaıdan shyǵardy? Eńbektegen baladan, eńkeıgen qartqa deıin Týymyz ben Eltańbamyzdy tanıdy. Álem tanıdy. Moıyndaǵan. Qyzyǵady. Tek sol Kók tý men Eltańbany ózgertip emes, dúnıe qazaqtaryn biriktiretin kúshke aınaldyrý úshin jumys jasaý kerek. Túrli qysym jasamaı árbir azamat Tý men Eltańba beınelengen tósbelgini erkin taǵyp júrsin. STO, ashananyń ár ústelinde tursyn. Barlyq jerge ilinsin. Aıyppul, anaý-mynaý dep qysa bermeı.  Jańa Qazaqstan Tý men Eltańbany ózgertkennen jańaryp ketpeıdi", depti ol kisi ashyna. 

Onyń ornyna ol elimizde saıası, ekonomıkalyq reformalar júrgizilse, 32 jyl boıy eńsesin tikteı almaǵan ana tildiń jaıyn jóndep alsa, halyqtyń áleýetin kóterse degen tilekte. 

"Shetelge mlrdtap ketken qarajatyń men satylyp ketken jetimderińdi, otanyna oralǵysy keletin qandastaryńdy jına! Jyly kabınette otyryp alyp, BAQ arqyly, jeke adamdardy salyp qoǵamdyq pikir týǵyzǵandy qoıyńdar. Bizge eldiń birligi men tirligi kerek. Qalǵany bos sóz. Men qarsymyn!", deıdi Asylbek Baıajuma jelidegi jazbasynda. 

Degenmen aramyzda bul ıdeıaǵa ún qosqandar da tabylyp jatyr. Olardyń basym bóliginiń janyna Eltańba shekesindegi juldyz batatyn bolyp shyqty. Ol juldyz Keńes odaǵyn eske túsiretin kórinedi...

Negizi, saıasatta ashýǵa býlyqqan áleýettiń "býyn shyǵaryp alý" degen tásil bar. Iаǵnı, adamnyń ishindegi ashý-yzasyn kólgirsı salǵan bireýge tóktirip, ózderi (saıası júıe) jaltaryp ketý úshin. Bul osyndaı amal da bolýy bek múmkin dep topshylap jatqandar da joq emes.