BQO ákimi turatyn VIP saraıdyń sýreti tarap ketti

Jalpy, Oraldaǵy bul rezıdensııa 20 jyl buryn turǵyzylypty. Keshen Batys Qazaqstan oblysyna jumys saparymen keletin joǵary laýazymdy tulǵalardyń turýyna arnalǵan. Shendi-shekpendilerdiń iskerlik nemese jumys saparlary qysqa merzimge belgilenetin bolǵandyqtan, bastapqyda bul keshenniń bos turǵan kezi kóp bolypty. Bul nysandy kútip, baptap ustaý jergilikti bıýdjetke 100 mln teńgege túsedi eken. Anda-sanda qoldanylatyndyǵyna qaramastan óńir basshylyǵy bul nysannan bas tarta almaıtyn kórinedi.

Ákimdiktiń atalǵan máselege qatysty taratqan aqparatynda Narıman Tóreǵalıevtiń búginderi sol rezıdensııada turyp jatqany rastalady. Munyń sebebin ákimniń basqa baspanasynyń bolmaýymen túsindiredi. Sondaı-aq ákim kommýnaldyq qyzmetter aqysyn óz qaltasynan tólep otyrǵany da aıtylady.

«Qarastyrylyp otyrǵan Oraldaǵy «Samal» yqsham aýdanynda ornalasqan ári kúzetiletin óte mańyzdy nysan. Onyń zańnamamen qarastyrylǵan ózindik tártibi bar. Ol óńirge kelgen memlekettik tulǵalarǵa arnalǵan. Oblys aýmaǵynda joǵary deńgeıdegi túrli is-sharalar, sonyń ishinde halyqaralyq yntymaqtastyq forýmdary, mádenıet jáne óner festıvalderi, sheteldik ınvestorlarmen kezdesýler ótip jatady», delingen baspasóz habarlamasynda.

Alaıda, oblysta halyqaralyq standarttar men etıketke sáıkes keletin ózge ınfraqurylym joq.

"Sondyqtan bul nysan Qazaqstan Respýblıkasy zańnamasynyń normalarynda kózdelgen talaptardy iske asyrý maqsatynda delegasııalardy ornalastyrý jáne tıisti kúzetti qamtamasyz etý maqsaty boıynsha paıdalanylady", delingen jaýapta.

Ákimdiktiń baspasóz qyzmeti "QR Memlekettik qyzmet týraly" zańy boıynsha basqa eldimekenge rotasııalaý kezinde memlekettik qyzmetkerlerdi "Turǵyn úı qatynastary týraly" zańǵa sáıkes qyzmettik baspanamen qamtamasyz etý sharty baryn eske salady.

«Narıman Tóreǵalıev BQO ákimi bolyp taǵaıyndalǵanǵa deıin Astanada turyp kelgen. Sondyqtan ol óz qyzmetin júzege asyrý kezeńinde kúzetiletin adamdarǵa arnalǵan aýmaqqa ornalastyryldy», delingen habarlamada.

Sondaı-aq nysannyń kútimine jumsalatyn jyl saıynǵy shyǵystar (kommýnaldyq qyzmetter, abattandyrý, jóndeý jáne kútip ustaý, jalaqy, salyqtar jáne mindetti tólemder) boıynsha mynandaı málimet berildi: 2023 jyly - 89,7 mln teńge, 2024 jylǵa arnalǵan josparda 85,2 mln teńgeni quraıdy.  

Sóz oraıy kelgende, bir  jyl buryn Memleket basshysy Qasym-Jomart Toqaevtyń tapsyrmasy boıynsha Qazaqstannyń bes qalasyndaǵy (Aqtóbe, Aqtaý, Atyraý, Qostanaı jáne Taraz) Prezıdent rezıdensııalary balalarǵa beriletini belgili bolǵanyn aıta ketelik. Osyǵan baılanysty ákimdikter nysandardy tapsyrar aldynda olardyń mártebesin qaıta rásimdep, balansqa qoıý kerek bolatyn. Sol tapsyrma boıynsha, qazir Aqtóbedegi rezıdensııaǵa 25 bala jiberilgeni belgili. Basqalaryna qatysty eshqandaı málimet joq. 

Aıta ketsek, Narıman Tóreǵalıev 2022 jyldyń jeltoqsan aıynan bastap Batys Qazaqstan oblysynyń ákimi qyzmetin atqaryp keledi.