Navalnyı - saıasatker emes, kúresker

"Qyzyq. Nege ekeni belgisiz, Navalnyı alǵashqy oppozısııalyq kezdeýin Abaı eskertkishi (Máskeý) janynda ótkizedi ǵoı. 12 jyl buryn bolýy kerek. Sol kezde ol kisi Abaıdy abaısyzda «belgisiz aqyn» dep aıtyp qalyp, ońbaı aýyzy kúıgen. Munysy úshin Navalnyı: «Qazaqtar, keshirińizder meni. Abaı týraly «Vıkıpedııadan» oqyp-bilýge ýáde beremin» dep kinásin moıyndap, artynan aqtalǵandaı da bolǵan. Biraq bizdikiler birazǵa deıin ókpelep, «Moı mır» jelisi arqyly oǵan «belgisiz aqyn» týraly aıybyn arakidik eske salyp júrdi.

Qazir kóbisi osy jaıtty bile bermeıtin bolar, óıtkeni ol kezde jurttyń bárinde birdeı ınternet bola bermegen: qazirgideı Instagram da, Telegramm da joq. Keıbireýler jumysyndaǵy kompıýteri nemese noýtbýgy arqyly «VKontakte», agent jáne «Moı mırge» kiretin ol kezde.

Eger 2012 emes, shartty túrde 2020 jyl boldy delik desek sol kezde, bizdikiler Navalnyıǵa qarsy jappaı dúrse qoıa berip, ony Sımonıan nemese basqalar sekildi elge kirgizbeıtin tulǵa jasaýdy talap eter me edi, qalaı?  Iá, «ortalyqazııalyq odaq» qurý umtylysy, mıgrantofobııaǵa keletin onyń sózderi bizdegilerge jaqpaıtyn. Jalpy, o shetti bu shetke jalǵap, bireýdi ıdeal etýge bolmaıdy degendi aıtqym kelip otyr bul arada.

Navalnyıdy biz qurmetteımiz, alaıda ony saýatty saıasatker nemese «prezıdenttikten úmitker» retinde emes, kórshimizdiń bylyq-shylyqqa ábden batqan júıesimen kúresker retinde moıyndaımyz. Kim biledi, Navalnyı prezıdent bola qalsa, sol Pýtınnen asyp aryǵa kete qoımaýy múmkin be edi?.. Adamdy synaǵyń kelse, qolyna bılik pen aqsha ber deýshi me edi?.. Qalaı degenmen de bul meniń jeke oıym.

Mysaly, men Navalnyıǵa qaraǵanda Nemsovty saıasatker, ıdeolog retinde kóre alamyn. Saıasatker, Reseıdiń kóshbasshysy bola alatyn tulǵa retinde onyń esimin esh shúbásiz atar edim.

Navalnyı -  eń birinshi kezekte kúresker, saıasatker emes! Ol elge oralý týraly sheshim qabyldaǵanda munda ózin ne kútip turǵanyn jaqsy bildi. Onyń ornyna sol shetelde qalyp, ystyq kofesin urttap qoıyp, Germanııanyń bir jerinde kezekti bir Dýdke suqbat berip, urymtal sátti kútip otyra berse, túgi de joq edi.

Tipti, ýlanyp, kóp uzamaı búkil álem aldynda ózin ýlaǵan adamǵa qońyraý shaldy emes pe? Mine, osydan keıin, saıasattan jyraq adamnyń ózine Reseıge kelse oǵan ne bolatyny aıan edi. Soǵan qaramastan ol ajalǵa basyn tigip, týǵan jerine oraldy.  

Onda da ol 2005, tipti 2014 jylǵy Reseıge emes, sıýrrealızm men adasýdyń qaınap jatqan ortasyna top ete tústi. Munysy, árıne erlik, árıne qaharmandyq. Sondyqtan da onyń ólimi búkil álemdi dúr silkintti.

Ony óltirý nege kerek boldy? Pýtın onyń jaıdan-jaı kele jatpaǵanyn bildi. Navalnyı da túrmege túsetinin ishteı sezdi. Biraq Navalnyıda Pýtındi, onyń rejımin túbinde jeńemin, túrmeden burynǵy terror men totalıtarlyq rejımniń qurbany ári qaharmany bolyp shyǵamyn degen úmit boldy. Bir sózben aıtqanda, orystyń Nelson Mandelasy bolamyn dedi. Munyń bárin Pýtın jaqsy bildi, ásirese saılaý naýqany jaqyndaǵan saıyn...

Bárinen ókinishtisi, Navalnyıdyń óliminen soń (fılminde amanat etip ketkendeı) júıege qarsy shyǵyp, sońyna deıin berispeı kúresetin Reseıde eshkim qalmaǵan sekildi", dep jazady jýrnalıst jelide.