Atyraýda úıler qulap jatyr. Jergilikti halyq tótenshe jaǵdaı jarııalaýdy talap etti

«Atyraýda Juldyz, О́rken, Mıras, Balaýsa jáne basqa da birneshe yqshamaýdan halqy jaýyn-shashyn zardabyn tartyp otyr. Birneshe kúnnen beri aýlasyndaǵy qar sýymen óz betinshe arpalysyp júrgen Marat Taqanovtyń tańerteń garajy men jazǵy úıiniń qabyrǵasy opyrylyp qulaǵan», dep habarlaıdy KTK telearnasy.

«Mine, ýaqytsha turaǵymyz da qulap qaldy. Búgin tańda qulady. Osylaı sýǵa ketip jatyrmyz. Eshqandaı kómek joq. Keshe sý tasıtyn kólik keledi degen, onysy búgin tańerteń keldi», deıdi Taqanov.

«Qazirgi jaǵdaıymyz, tipti qıyn. Minekeı, úlken kisi, aqsaqal, bul kisiniń shańyraǵynyń qalaı sýǵa ketip jatqanyn adamdar kórdi. Biraq eshqandaı kómek joq. Qanshama úı qulap jatyr. Jigitter sý keship júr. Biraq nátıje joq» dedi Jańbyrbaı Jumashov.

Serik Shápkenovtyń ózi halyq aldyna shyqpady. Al onyń orynbasary men ákimdiktiń basqa qyzmetkerleri ashýly jurtty tyńdaǵan da joq.

Kól-kósir bolǵan sýdan baspanasyna kirip-shyǵa almaı qalǵan turǵyndar úıin tastap kóship jatyr. Sýdy óz betinshe sorǵyzǵanymen, sálden soń dál osy qalypqa qaıta túsedi deıdi. Qala ákimi qyzyl sýdyń bulaı jınalýyn aryq júıesiniń joqtyǵymen túsindirdi. Degenmen qazir iri kompanııalardan jáne Oral qalasynan tehnıka suratyp jatyr eken.

Atyraý qalasynyń ákimi Shákir Keıkın: «Káriz nasos stansııasy joq, jańbyr sýyn júıeli túrde qalanyń syrtyna shyǵaryp jiberetin stansııa jasalmaǵan. Jerge sińbeı jatyr. Sýdy bir mezette shyǵaryp tastaý múmkin emes. Ol neshe kún alatynyn surasańyz, qazir jaýap bere almaımyn».

«Jaǵdaı tolyqqandy tekserilmeıinshe, tótenshe jaǵdaı da jarııalanbaıdy», dedi sheneýnikter.