"Qosanov" oınamaq bolǵan Kreml...

SIK degen (Ortalyq saılaý komıssııasy) Reseıde de bar. Onda otyrǵandar Borıs Nadejdın deıtin kandıdatty naýryzda ótetin prezıdent saılaýyna kandıdat etip tirkeýden bas tartty.

Pýtınniń soǵysyna qarsy ashyq sóılegen, "Navalnyıdy túrmeden shyǵaryp jiberem" dep batyl málimdeme jasaıtyn bul Borıs ózi qaıdan shyqty deseńiz, ony Kremldiń ózi shyǵarǵan edi. Kreml osyndaı adamdy sahnaǵa shyǵarý arqyly Ýkraınaǵa qarsy soǵysty, jalpy, Pýtınniń saıasatyn Reseıdegi halyqtyń basym bóligi qoldaıtynyn dáleldep, sony elge kórsetpek bolǵan.

"Bul paqyr óz betimen jarytyp qaıbir qol jınar, ary ketse 2-3 paıyz halyqtyń qolyn áreń jınaıdy-aý" dep pishken.

Sóıtse, olaı emes eken! Reseı halqy kezekke talasyp Nadejdınge jappaı qol jınap bere saldy. Reseı halqynyń basym kópshiligi shyndyǵynda kerisinshe, Pýtın men soǵystan ábden sharshaǵany bilinip qaldy. Sol sebepti SIK sebep taýyp, Nadejdındi kandıdat retinde tirkemeı tastady.

Borıs Nadejdındi oılap tapqan saılaýdyń kýratorlary qatelesip qaldy osylaı.

Kremldegiler Pýtındi Reseı halqynyń 79 paıyzy jata kep qoldaıdy degen jalǵan áleýmettik saýalnama nátıjelerine qatty senip qalǵan eken.

Borıs Nadejdın bárin byt-shyt qyldy.

Daýystar ádil sanalatyn shyn saılaý ótse, Pýtınniń Nadejdınnen oısyraı utylyp qalatynyn Kreml túsindi. Oıynnan órt shyqpaı turǵanda toqtatty ony.

Biraq Nadejdın joldan qaǵylyp tastalsa da, ony saılaýda qoldamaq bolǵandar, Pýtın men onyń soǵysyna qarsy halyq eshqaıda quryǵan joq. Olar endi ortaq kelisim taýyp, 17 naýryzda Pýtınnen basqa kez-kelgen kandıdattyń birine jabylyp daýys berýi múmkin.

Pýtın men Kreml úshin bul óte kúrdeli, qymbat, qaýipti saılaý bolaıyn dep turǵany anyq.