Bas múftı Aqtóbe oblysynda saparmen boldy (Foto)

18-19 kúnderi QMDB tóraǵasy Naýryzbaı qajy Taǵanuly Aqtóbe oblysynda is-saparmen boldy.

Sapardyń alǵashqy kúni oblys ákimi Ońdasyn Orazalınmen kezdesýden bastaldy. Odan keıin Bas múftı «Ihsan – rýhanı tárbıe negizi» jáne «Tolyq adam» kitabynyń tanystyrylymyna qatysyp, óńirdegi zııaly qaýym ókilderimen suhbattasty.

Naýryzbaı qajy Taǵanuly «Ás-Sálam» jeke qaıyrymdylyq mekemesiniń (medrese) ashylý rásiminde Dinı basqarma bastamasyn qoldap, Qaıyrymdylyq mekemesin salýǵa demeýshi bolǵan azamattarǵa aıryqsha alǵysyn bildirdi.

Munan soń QR Ishki ister mınıstrligi Qylmystyq atqarý-júıesi komıtetiniń «KA-168/1 mekemesinde» «Jýsan» operasııasy arqyly elge oralǵan jáne terrorızm baby boıynsha jazasyn óteýshilermen jalpy jáne jeke kezdesýler ótkizip, nasıhat aıtyp, túsindirme jumystaryn júrgizdi.

Bas múftı jazasyn óteýshilermen kezdeskennen keıin «Aqtobe» telearnasyndaǵy «Sáti túsken suhbat» baǵdarlamasynda qonaq boldy. Sapardyń birinshi kúni oblystyq ortalyq «Nur Ǵasyr» meshitinde qala jáne aýdan ımamdarymen kezdesip, dáris ótýmen qorytyndylandy.

Ekinshi kúni Bas múftı Naýryzbaı qajy Taǵanuly «Igi ister» qaıyrymdylyq marafonyna qatysyp, «Aıala» ońaltý ortalyǵyndaǵy balalarmen júzdesti. Sondaı-aq «MUNARA TV» telearnasynyń osy óńirdegi fılıalynyń ashylý rásimine qatysty.

QMDB tóraǵasy oblystyq ortalyq «Nur Ǵasyr» meshitinde «Zeket jáne qaıyrymdylyq» qorynyń «El úlesi – páterge» atty qaıyrymdylyq aksııasy aıasynda respýblıka boıynsha 531, 532-shi Aqtóbe óńiri boıynsha 23, 24-shi baspana kiltin Aqtóbe oblysy Muǵaljar aýdany Embi qalasynda turatyn bir kópbalaly, jalǵyzbasty (4 qyz, 3 ul, ıaǵnı 7 balanyń) jáne bir múmkindigi shekteýli anaǵa tabystady.

Munan bólek bas múftı Aqtóbe oblysyna barǵan sapary aıasynda «Aqtóbe» medrese-kolledj shákirtterine dáris oqyp, qalada salynyp jatqan jańa dinı oqý ordasynyń qurylysymen tanysty. Sonymen qatar «Islam – yntymaq pen birlik» jyly aıasynda ótken oblystyq qazaq kúresinen eresekter arasynda ashyq týrnırdiń jeńimpazdaryn marapattady. QMDB tóraǵasy Naýryzbaı qajy Taǵanuly Aqtóbe oblysyna jasaǵan sapary Temir aýdany, Shubarqudyq kentindegi Dosjan ıshan Qashaqulynyń kesenesine zııarat etip, baba rýhyna qasıetti Quran aıattaryn baǵyshtaýmen qorytyndylandy.

Aqtóbe oblystyq ortalyq «Nur Ǵasyr» meshitiniń baspasóz qyzmeti