Aqtóbe oblysynda taǵy eki aýylǵa gaz keldi

24 qarasha kúni Aqtóbe oblysynyń Mártók aýdanyna qarasty Voznesenovka jáne Dostyq aýyldaryna gaz kirdi. Gaz qubyrlaryn iske qosý rásimine oblys ákimi Ońdasyn Orazalın qatysty.

"Memleket basshysynyń aýyldyq aımaqtardy damytý týraly tapsyrmalaryna sáıkes Aqtóbe oblysynda aýyldardy gazdandyrý, sýmen jáne basqa da ıgiliktermen qamtý boıynsha aýqymdy sharalar júrgiziliýde. Bul baǵyttaǵy jumystar jalǵasatyn bolady",- dedi oblys ákimi quttyqtaý sózinde.

Voznesenovka aýylynda 148 úı men alty áleýmettik nysan, al Dostyq aýylynda 112 tútin men eki áleýmettik nysan bar.

«Árıne, gaz kelmeı turyp, kóp qıyndyqtar boldy. Sý tórt jyl buryn júrgizilgen. Qazir úıde sý bar, endi gaz keldi. Qýanyp jatyrmyz. Barlyq aýyl turǵyndarynyń atynan Prezıdentke, oblys ákimine, úlken jumys atqarǵan jumysshylarǵa alǵys aıtamyn. Gaz qubyrlary salyna bastaǵanda eki aıdan keıin gazdyń ıgiligin kóretinimizge senbegen edik», - deıdi qýanyshymen bólisken Dostyq aýylynyń turǵyny Altynaı Esqarına.

Aıta keteıik, aýyldardy gazdandyrý jobalary Nur Otan partııasynyń saılaýaldy baǵdarlamasynyń Jol kartasy aıasynda júzege asyrylǵan. Bul maqsatqa 617 mln teńgeden astam qarajat bólindi.
Voznesenovkada oblys ákimi sondaı-aq, mádenıet úıiniń jumysymen tanysty. Mekeme ǵımaraty 1975 jyly salynǵan. Munda jýyrda jóndeý júrgizilip, qasbeti, terezeleri, esikteri men sahnasy jańartyldy, jaryq pen gaz júrgizildi, kıim-keshek turatyn bólme jabdyqtaldy. Saryjar aýyldyq okrýginde Ońdasyn Orazalın «Baı Orda» sharýa qojalyǵynda boldy. Qojalyq sharýalardy memlekettik qoldaý baǵdarlamalaryn paıdalanyp, mamandandyrylǵan tehnıka satyp alý úshin 28 mln teńge jeńildetilgen qaryz alypty, byltyr túıirshiktelgen jem shyǵaratyn sehty iske qosqan. Sehtyń qýattylyǵy – saǵatyna 1 tonna túıirshik.

«Men telekommýnıkasııa salasynda segiz jyl eńbek ettim. 2017 jyly jumystan shyǵyp kettim de, aýyl sharýashylyǵymen aınalysamyn dep sheshtim. Qazir shartári shyǵaramyz. Gúltáji ósiremiz, bul qurǵaqshylyqqa tózimdi birjyldyq daqyl. Ár gektardan 20 tonnaǵa deıin jasyl massa alýǵa bolady. Birinshi jyly, árıne, qıyn boldy – jerdi zerttep, óńdeý kerek degendeı. О́tken jyly, sehty iske qosqanda da ońaı bolǵan joq, adamdar tipti túıirshiktiń ne ekenin bilmedi. Bıyl, qurǵaqshylyqqa baılanysty Aqtaýdan satyp alýshylar bar. Jergilikti turǵyndar ázirge az alyp jatyr, biraq jaılap etteri úırenýde. Suranys kóp. Byltyr ótkizý jaǵy problema bolǵan, bıyl kerisinshe – satyp alýshylar kóp. Memleket úlken qoldaý kórsetip, maǵan jerdi 49 jylǵa berdi, eki jyl salyq tólemeımin», - deıdi qojalyq basshysy Ertaı Kenjebekov oblys ákimimen áńgimesinde.

Táńirbergen aýyldyq okrýginde Ońdasyn Orazalın ýchaskelik polısııa ınspektory men veterınar dárigerdiń kabıneti ornalasqan ákimdiktiń jańa ǵımaratyn qarap shyqty.

Budan bólek, óńir basshysy uzyndyǵy 15 shaqyrymdyq «Voznesenovka-Mártók» avtokólik jolyn, sonymen qatar, 15 jyl paıdalanýǵa eseptelgen qatty turmystyq zattarǵa arnalǵan jańa polıgondy qarap shyqty.

Aıta keteıik, jaryn Aqtóbe oblysynda qatty turmystyq zattarǵa arnalǵan polıgonnyń qurylysy boıynsha segiz joba júzege asyrylmaq. Osylaısha, oblys aýdandarynyń barlyǵy polıgonmen qamtylatyn bolady.