BJZQ: Qordan alynǵan qarajat paıdalanylmaı keri qaıtatyn túri bar

Byltyr kúzde memleket basshysynyń zeınetaqy qoryndaǵy shektik mólsherden asqan qarajatty óz ıelerine berý týraly bastamasy barshamyzdy qýantqan edi. Bul talaılardyń baspanaly bolýǵa úmitin úrledi desek te bolady. Alaıda shyndap kelgende, halyqtyń jyldar boıyna zeınetaqy qoryna jınaǵan qarjysy ózine qoljetimdi bolmaı tur. Bylaı qarasań, sol jasyna laıyqty kerekti somany jınap qoıǵan. Shektik mólsherden asqan qarajat – bireýlerdiń tyrbanyp júrip eńbek etip, tipti birneshe jerden alatyn jalaqysynan jyryp otyryp, zeınetaqy qoryna baǵyttalǵan óz qarjysy.

 Biraq áleýmettik jaǵdaıyńdy kóteredi dep úmittengen sol qarjyńa óziń ıelik ete almaı, kerisinshe mıllondaǵan qaryzǵa batyp, aqyrynda aıyppul tóleseń she?

Elimizdiń bir turǵyny retinde óz basymnan ótken jaıdy baıandaıyn. Memleket basshysynyń sheshimi shyǵa sala, qordaǵy qarajatymdy tekserdim. Shotymdaǵy jınaǵym shektik mólsherden eki mıllıon teńgege jýyq  asyp tur eken. Oılanbastan, baspanaly bolýǵa jumsaımyn dep sheshtim. Alaıda, ile-shala  naryqta osyǵan deıin kózdep júrgen bir bólmeli páterlerdiń baǵasyn qarasam, talyp túse jazdadym. Kúni keshe ǵana 11-12 mıllıon shamasynda  turatyn ondaı páter baǵasy birden 18-19 mıllıonǵa bir-aq sekiripti.

 О́tinish berip, qordaǵy artyq eki mıllıondy «Otbasy» bankinen esep shot ashyp túsirip te qoıdym. Kezekti ret Enpf-otbasy.kz platformasynda mártebemdi teksergende, Otbasy bankke baryp, maqsatymdy naqtylaý qajettigin kórsetipti. Bankke bardym. Qyzyq osy jerden bastaldy. Bank operatory 45 kún ishinde alatyn úıimniń qujattaryn ákelip kórsetýimdi jáne zeınetaqy qorynan alǵan qarjymnyń ústine aqsha quıyp, alatyn úıimniń elý paıyz mólsherin jınap ákelsem ǵana Otbasy bank arqyly úıli bolatynymdy jetkizdi. Áıtpese qarjy keıin qaraı BJZQ qaıtady eken.

Qazir naryqtaǵy bir bólmeli páterdiń baǵasy 20 mln. ekenin eskersek, 10 mıllıon teńge qolymda turýy kerek eken. Iаǵnı zeınetaqy qorynan alǵan 2 mıllıonymnyń ústine taǵy segiz mln. óz qaltamnan quıýýym kerek. Sonsha aqsha qolymda tursa, zeınetaqy qoryndaǵy eki mıllıondy kútpeı-aq osyǵan deıin úıli bola bermeımin be?! Onyń ústine 45 kúnniń ishinde úı baǵasynyń da túse qoımaıtyny belgili. Zeınetaqy qorynan eki mln, aldym eken dep, quny yshqynyp turǵan úıdi jantalasyp, qalaısha nebary 45 kúnniń ishinde  rásimdeı qoıamyn?! Endeshe, dál osy jaǵdaıda BJZQ-daǵy shektik mólsherden asqan qarjyny alý júıesin halyqqa tıimdi júıe dep aıta alamyz ba?! 

Amalym quryp, eń bolmasa jer alaıynshy dedim. Sóıtip edim, menedjer: «Jer alý úshin qurylys kompanııasy arqyly jerdi kórsetip, smetańyzdy bekittirip alasyz. Sosyn eki jyl ishinde ol jerge úı turǵyzýyńyz kerek. Úlgermeseńiz, aıyppul tóleısiz (!)» dedi. Mássaǵan! О́zi orta sharýanyń tam-tumdap jınaǵan az-maz qarjysyna qurylys kompanııasyn aralastyrý qanshalyqty durys? Bálkim men bolmashy aqshamdy tıimdi ıgerý úshin tanysymnyń arzanyraq qyzmetine júgingim keletin shyǵar?! О́kinishke qaraı, zeınetaqy qoryndaǵy qarajatty ıgerý kezinde mundaı múmkindikter qarastyrylmapty.

42500 teńge úshin vırýsqa qaramaı, qujat daıyndap, shybyn janynan 42500 artyq bolǵan halyqqa eki mıllıon kóp aqsha bolyp kóringeni ras. Tipti Otbasy bankine salyp, ústine aqsha jınap, úı baǵasy túsýin kútip, ildálap úıli bolýdy oılaǵanym da ras. Biraq jeme-jemge kelgende turǵyn úı alý úshin elý paıyzyna da jetpeıtin, jer alaıyn desem eki jylda ol jerge úı sala almaıtyndyqtan zeınetaqy qoryndaǵy qarajatymdy keri qaıtarýdan basqa amalym bolmaı tur...

Demek, jalǵyz men emes, men sekildi talaı jannyń aqshasy keri qaıtary da anyq! Sonda tetikteri halyq múddesine saı oılastyrylmaǵan bul júıeden ne úmit, ne qaıyr?! Endeshe, elge eshqandaı paıdasy joq nárseni dyrdaı qylyp jarnamalaý jaı halyqty aldaý ma? Halyqqa osylaı jaqsy atty kóriný kimge kerek boldy eken?...