Uly Abaıdyń dańǵylyn Nazarbaevqa bermeı qoıdy

Qostanaıdaǵy Abaı dańǵylyna Nazarbaev atyn berý jaıly qalalyq máslıhattyń usynysy keri qaıtarylǵannan beri qalada qaı kósheni birinshi prezıdent atymen ataý máselesi sheshilmegen. Tyńdaý shildeniń 29-y kúni ótedi, bul aqparatty jergilikti ákimdik rastaǵan dep habarlaıdy Qamshy.kz aqparat agenttigi Zakon.kz saıtyna silteme jasap.

Qostanaı qalasynyń ákimi Qaırat Ahmetov "mundaı usynysty birneshe ujym ókilderi jasaǵanyn" aıtty. Onyń aıtýynsha, bastama kótergen azamattar Gagarın kóshesin - Nazarbaev dep ózgertip, Gvardeıskıı kóshesine Gagarın atyn berý týraly usynys jasaǵan.

Qazaqstandy 30 jylǵa jýyq basqarǵan Nursultan Nazarbaev otstavkaǵa ketken soń onyń ornyna kelgen Qasym-Jomart Toqaev qyzmetine kirise sala el astanasyn Nur-Sultan dep ózgertip, "oblys ortalyqtaryndaǵy negizgi kóshelerge Nazarbaev atyn berý kerek" dep málimdegen edi. Osydan soń eldegi birneshe qaladaǵy kóshelerge Nazarbaev aty berildi.

Aqparat boıynsha, Qostanaı qalalyq máslıhatynyń depýtattary bastapqyda qaladaǵy Abaı dańǵylyn Nazarbaev atymen ataý týraly usynys jasaǵan. "Nasha gazeta" forýmyndaǵy aqparatqa sáıkes, bul boıynsha túpkilikti sheshim qabyldamaı jatyp qaladaǵy Abaı kóshesindegi taqtaıshalardyń keıbiri alynyp ta úlgergen. Biraq keıinnen respýblıkalyq onomastıkalyq komıssııa bul usynysty qaıta qaraý qajettigin aıtqan.

Basylym forýmynda Qostanaıda qaı kóshege Nazarbaev atyn berý týraly shaǵyn saýalnama da bar. Shamamen 123 adamnyń basym bóligi Táýelsizdik kóshesin ózgerteıik dese, keıbiri Ál-Farabı dańǵylyna birinshi prezıdent atyn bereıik degen usynys aıtqan. Usynystar arasynda Iýrıı Gagarın, Ǵafý Qaıyrbekov kósheleri bar.