"Qarjy tapshylyǵynan kóp balaly otbasylardyń úı alýǵa múmkindikteri joq..."

Baýyrjan Baıbek qoldaýǵa zárý kópbalaly otbasylardyń alǵashqy jarnasynyń tólemin sýbsıdııalaý múmkindikterin qarastyrýdy tapsyrdy.

«Nur Otan» partııasy qalalyq fılıalynyń kezekten tys konferensııasynda Almaty ákimi Baýyrjan Baıbek quramyna memlekettik járdemaqy, adrestik kómek, áleýmettik tólem, demeýshilik kómek, eńbekpen qamtý jáne basqalary engen qoldaýdyń keshendi sharalaryn atap ótti.

«Qala jáne aýdan ákimdikteri turmysy tómen kópbalaly analarmen kezdesýler ótkizdi, aýdandyq fılıaldar basshylarynyń esepti kezdesýlerinen usynystar túsýde. Saraptama turǵyn úı máselesiniń barynsha ótkir turǵanyn kórsetti. Qarjy tapshylyǵy saldarynan olardyń turǵyn úı alýdyń jeńildetilgen baǵdarlamasyna qatysýǵa da múmkindikteri joq. Sondyqtan 4 jáne odan da kóp balalary bar otbasylardyń alǵashqy jarnasynyń tólemin sýbsıdııalaý múmkindigin qarastyrǵan jón», - dedi Baýyrjan Baıbek.

Buryndary megapolıs basshysy «Baqytty otbasy» atty kópbalaly analardyń ortalyǵyn qurýdy, munda olarǵa zańnamalyq, psıhologııalyq keńester men reabılıtasııalyq kómek kórsetýdi usynǵan bolatyn. Bul ortalyq bir tereze qaǵıdasy boıynsha jumys jasaıdy jáne kópbalaly analar jumysqa ornalastyrylady.

Megapolıs basshysy áleýmettik ál-aýqat, strategııa jáne bıýdjet basqarmalaryna jáne basqa da quzyrly organdarǵa bir apta ishinde osy másele boıynsha jumys jasaýdy jáne naqtyly usynystar aıtýdy tapsyrdy.

Aıta keterligi, Almaty bıýdjeti áleýmettik baǵytqa negizdelgen jáne halyqty áleýmettik jaǵynan qamtýǵa bólinetin qarjy jyl sanap arta túsýde. Qazirgi kezde bıýdjettiń 50%-dan astamy nemese 200 mlrd. teńgeden astam qarjy densaýlyq saqtaýǵa, bilimge, turmysy tómen jandarǵa kómek kórsetýge, kommýnaldyq shyǵyndardy sýbsıdııalaýǵa, túrli járdemaqylardy tóleýge jumsalýda.

«Nur Otan» fraksııasy máslıhatta túrli áleýmettik máselelerdi kóteredi. Olardyń usynystarynyń barlyǵy jergilikti atqarý organdarynda oń sheshimin taýyp, qalada iske asýda.

Mysaly, 2016 jyldan bastap partııa fraksııasynyń bastamasy boıynsha bala baqshalar tólemderi 27 den 15 myńǵa azaıdy. Bul maqsat úshin bıýdjetten jyl saıyn 3 mlrd. teńgeden astam qarjy bólinedi, munda 60 myń otbasy qamtylǵan. Sońǵy tórt jyl ishinde memlekettik tapsyrys esebinen bala  baqshadaǵy oryndar sany 3 ese artty nemese 4,7 myńnan 15,5 myńǵa ósti. Jalpy, bala baqsha oryndaryn sýbsıdııalaý úshin jyl saıyn 18 mlrd. teńgeden astam qarjy bólinedi. Bul sıfr úsh jyl ishinde 2 ese ósti.

Turmysy tómen kópbalaly otbasylardyń 11 synypqa deıingi balalary tegin tamaqtanady jáne olarǵa mektep formasy tegin beriledi. Mundaı qajettilikterge jyl saıyn 800 mln. teńgeden astam qarjy bólinýde. Kópbalaly otbasylardyń 4 myńnan astam balalarynyń tegin demalysyn uıymdastyrýǵa jyl saıyn 230 mln. teńge qarastyrylǵan.

Bulardan ózge, sońǵy 4 jyl ishinde partııa usynysy boıynsha kópbalaly otbasylardyń músheleri, mektep, kolledj oqýshylary JOO stýdentteri men zeınetkerler jolaqynyń jeńildetilgen 50 paıyzyn ǵana tóleıdi, buǵan jyl saıyn 5 mlrd teńgeden astam qarjy jumsalady. Jeńildikpen 350 myńnan astam adam qamtylǵan.

Partııa bastamasy boıynsha túrli ótemaqylar beriledi. Mysaly, 2,3 myń otbasynyń, onyń ishinde kópbalaly analardyń kommýnaldyq shyǵyndary óndirildi. Osy kategorııadaǵylardyń úılerine eseptegish kommýnaldyq qondyrǵylardy ornatý shyǵyny ótelýde. Búgingi kúni 1000-nan astam otbasyǵa 50 mln. teńgeden astam qarjylaı kómek kórsetildi.