"Búgin úshinshi kún, tas qarańǵy, sýyq úıde otyrmyz" - Astanada órtten zardap shekkender

"Búgin úshinshi kún, tas qarańǵy, sýyq úıde otyrmyz". Astanadaǵy órt oqıǵasynan zardap shekken turǵyndar osylaı dep, jergilikti bılikten járdem surap otyr. Jekemenshik jataqhanalardyń birinde bolǵan tótenshe jaǵdaı kezinde balalar terezeden sekirip ketken. Qazir aýrýhanada jatyr. Bul týraly Qamshy.kz aqparat agenttigi Eýrazııa birinshi arnasyna silteme jasap habarlaıdy.  

Oqıǵa 9 aqpan, senbi kúni keshki saǵat 8-den asa bolǵan. Astananyń Baıqońyr aýdany, Oıyl kóshesinde. Aldymen jaryq óship qalǵan. Jıi bolyp turatyn jaǵdaıǵa boıy úırengen turǵyndar elektr jaryǵynyń janýyn kútip otyrǵanda tútinniń ıisi shyǵypty. О́rt birinshi qabatta kire beristegi turmystyq bólmeden tutanǵan. Qutqarýshylar da der kezinde jetipti. 
 
“Aldynda elektr symynyń tuıyqtalýy bastalyp, tútindenip, órt shyqty. Korıdorda ot shashyraı bastady. Esikti jaba saldym da, eki nemeremdi, balalardy alyp terezeden shyqtyq”, - deıdi jataqhana turǵyny Gúlmıra Shyǵanbaeva.

Qoıý tútinniń ıisi ǵımarattyń ishin  alyp ketken. Dúrlikken turǵyndar balalarmen birge  jataqhananyń ekinshi qabatynan sekirgen.  Oqıǵa kezinde tórt balaǵa ıis tıip, aýrýhanaǵa tústi. Sol tórteýdiń biri - Aıdyn Rahymjanov. Balǵyn sol kúni oqıǵany áli umyta alar emes.   

“Biz ekinshi etajdan sekirdik. Sosyn mamam aıtty, kómektesińder dep. Aǵaılar kelip, bizdi kóterip alyp shyǵardy. Sosyn dárigerge bardym”, - zardap shekken Aıdyn Rahymjanov.

Zardap shekken 4 balanyń ekeýi úılerine shyǵarylǵan. Al 2012 jáne 2013 jylǵy týǵan  eki kishkentaı áli dárigerlerdiń baqylaýynda. Mamandardyń sózinshe, balalarǵa ıis tııýmen qatar, olar  qatty úreılenip qalǵan. Sol úshin naýqastarmen psıhologtar jumys isteýde. 

“Balalardyń jaǵdaıy turaqty. Qazir eki bala jatyr. Úlkendeý eki balanyń jaǵdaıy durystaldy, ata-anasy alyp ketti úıine. Qalǵan ekeýi jaman emes, bir eki kúnniń ishinde úılerine ketedi”, - deıdi №2 qalalyq balalar aýrýhanasynyń bas dárigeri Birjan Dosmaılov.

Osy oqıǵanyń aldynda da jýyrda jataqhanada órt shyǵypty.  Sol kezde mán-jaıdy kórgen páter jaldaýshylar óz kúshterimen aǵashtan baspaldaq jasap, evakýasııalyq jol daıyndap qoıǵan eken. "Sonyń arqasynda aman qaldyq", deıdi. 

“Juma kún edi, erinbeı, asyǵyp tursam da ústine trap qoıyp, jaǵdaı bolsa, sekiresińder dep qoıyp ketkem. Sóıtip bári sol jaqtan qashyp shyqqan, onyń ústine sol kúni áıelimniń sińilisi kelgen, taǵy bir kisi qonaqqa kelgen, onyń eki balasy. О́zimniń bes balam bar, bári terezeden shyqty”, - dep aıtty jataqhana turǵyny Jandar Álıev.

Senbi kúnnen beri bul meken jaıda ne jaryq, ne jylý, ne sý joq. Jaqynda ǵana páteraqyny tólegen turǵyndar jaǵdaıymyz qıyndap ketti dep nalıdy.  

“Sol kúni  saǵat 8-den bastalǵan órtten tańǵy 6-ǵa deıin osy jerde júrdik. Bizdi eshqandaı jyly jerge aparǵan joq. jaǵdaıymyz jasalǵan joq. Búgin úshinshi kún, sýyq úıde otyrmyz. Balalardy týystarymyzǵa apardyq. Balalar sabaqqa bara almady”, - deıdi jataqhana turǵyny Gúlmıra Shyǵanbaeva.

Ár bólmeni jalǵa berip otyrǵan jataqhana ıesi de áli tóbe kórsetpegen. "Kelemin" dep jete almaı jatqan kórinedi. Biz de telefon soǵyp, habarlasa almadyq.

Usynǵan: Nazerke Labıhan